KRIST  IENNEACHO TISSRO AITAR

XUBHVORTOMAN – Luke 3:10-18

Ek Sfurthi: Mulla Nazruddin mhatare pirayer pavlolo. Eke sanje to aplea ixttam borabor cha piyetalo. Aplea ixttank to aplea fattlea jivitachi khobor sangta: "Jednam hanv tornatto aslom tednam sonvsarant vosta tem vaitt polleun hanv dukhi zatalom, ho sonvsar ani tantum jiyetat tim sogott mon'xam novsorlolim mhaka zai aslim. Ho bodol ghoddoun haddunk hanv dispottim Allah lagim mhaka boll magtalom. Hanv 50 vorsanche pirayer pavlom ani hanv kitench bodol korunk xoklo na tem hanvem pollelem. Akho sonvsar bodlunk chodd avhan mhonn hanvem mhojem magnnem haloilem...he pavtt mhojea ghorcheank ani chodd lagxilea ixtt-ixttimnichea jivitank novsornni haddunk mhaka boll-xokti di mhonn Allah lagim magtalom. Oxem korun anik 25 vorsam hanvem sarlim. Punn kaim foll mell'lo na punn mhojea jivitacho choddso kall sompot ailo. Aiz hanv 80 vorsancho zalam. Pattlim panch vorsam tem aiz meren mhojem magnnem oxem zata, ' Allah, zata zalear mhojich novsornni korunk mhaka adar di, mhojem jivit bodol ani Tuje khuxe ani yevzonne pormannem mhaka jiyeunk adar di". Ami mon'xam dusreanchea chukincher odik bariksannen nodor thiraytanv. 

Devachem Utor: Izrael porza patkant jiyetali ani tacho porinnam' koso tika dusmanachea hatakhal Babilonient pordes bhogunk poddlo. Tanchi got khub churchureanchi zali. Jerusaleak tim melolim koxim zaun gelim ani Jeruzalem xar dukh korun aslem. Baruk provadi sangta, 'tujem dukhichem ani khontichem anglem kaddun uddoi...Dev tuzo porzoll dakhounk sodta'. Baruk provadi Jeremias provadiacho chittnis aslo ani to-i Jeremiasa porim lokak khuxali korunk ulo korta kiteak Dev tanchem taronn kortolo. Dusrea Vachpant St. Paulu Filipichea Kristanvank boroun tankam vakhannta. Filipichim Kristanvam borem Kristi jivit jiyetat dekhun tanchi khori vadd zaunk axeta. Tea pasot tannim Devachi khol vollok gheunk; eka-mekachea mogan vaddunk ani kitem borem tem tannim vivekunk (discern) ulo korta. Xubhvortomanant, Juanv Batistachi khobor asa. To ek magnneacho monis ani tachem vhoddponn tache khaltikayechea jivitant disun yeta. Juanv Batist lokak jivit bodlunk ulo korta ani Kristak bott dakhoyta. 

Amchea Jivitak: Juanv Batist, Baruk provadi aple voten Kristak bott dakhoyta. Taronn zoddunk amcheo khotteo chali soddun diun nitt rostean ami cholunk gorjechem. Soddvonn zoddunk patok ek vhodd addkholl zaun asa. Patkak lagun Izrael porza gulam' zali. Punn jednam tannim aplem patok vollkun jivit bodol'lem tednam Devan tankam bhasailolea desant porot haddlim. Dusrea vachpantlea Filipkaramni patki jivit soddlem ani borem Kristi jivit jiyeun zaiteank nomune zalim. He porim zaiteank borem jivit jiyeunk tim sfurthi ditolim zalim. Borem jivit jiyeun amchean dusreanchi soddvonn korunk adarachim zaum yeta. Patka sorxilim pois ravunk ek boreantlo boro upai mhollear magnnem. Amche osoktayent magnneantlean boll zoddun gheum-ia ani Devak mandta toslim zaunk vavrum-ia. Patki jivitachim gulamam nhoi bogor jivit novsorun Somiak gheunk toyar zaum-ia.

BY FR. AVE MARIA AFONSO

taken from Vauraddeancho Ixtt

KRIST  IENNEACHO DUSRO AITAR

XUBHVORTOMAN – LK 3: 1 – 6

Aichea vachpancho sondex fokot ekuch zavn asa: Sorvesporacho marog toyar korat, tacheo vatto nitt korat. Xubhvortomanant Juanv Bavtist Izraelachea lokank arddun mhonntalo: Sorvesporacho marog toyar korat. “Sorvesporacho marog toyar korat” hacho orth kitem? Sorvesporachi vatt khoinchi? Sorvesporachi vatt mhonnlear mogachi, nitichi ani sontosachi  vatt. Nitt korpachi ti vatt mhonnlear, amchem khasgi jivit sarkem  korop. Devak vatto nitt korchi koslich goroz nam, punn amkam amchi chal Devachea utram pormannem cholchi odikuch goroz asa. Nitt korpachem asa tem amchem mon, amchim chintnam………Oxem korina zalear ami Jezuk amchea kallzamni ievkar divnk pavchim nanv.

Ghoddie ami hi kanni aikola zanvk puro. Ek dis Jezu aplea eka bhoktak  sangtam ki, to tachea ghora ietolo mhunn. Tea bhoktan bore bhaxen aplem ghor nitoll-nivoll korun, soglleo ghorcheo vostu bore bhaxen dovrun Jezuchi vatt pollevpak laglo. Oxem to vatt polloit astana ek gorib bhikari tachea darar ieta. To taka thoddem jevonn di mhunn vicharta. Punn to bhokt taka dhanvddaita ani sangta, “Mhaka aiz tras  dinv naka, mhojea ghora Jezu ienvcho asa”. Oxem mhonnun to dar dhampta. Thoddea vella uprant, ek lhan bhurgo tachea darar ieta ani taka ek pinzlolo pustok dakhoita. To tea bhoktak tea pustokachim panam chittkavnk sangta. Punn  to bhokt ragar zata ani tea bhurgeak mhonnta, “Tum faleam ieo, atam mhozo jiv khai naka, mhojea ghora aiz Jezu ienvcho asa”. Thoddea vellan tachea darar ek thontto udok magunk ieta. Taka legun to bhokt dhanvddaita. Sanjecho surio buddon rat zatana to bhokt nirasponnim magnnem korunk lagta. Ten’na to Jezuk aplea bhitoruch vicharta, “Tunvem mhaka bhasailolea ki tum aiz mhojea ghora ietoloi mhunn…………tor kitem zalem?” Jezu taka zap divn mhonnta, “Hanv tujea darar tin pavttim ailolom tori tum mhaka vollkunk pavlo naim.” Tea bhoktak apli chuk kollta.

Amchea jivitant legun heach bhaxen zanvk xokta. Natalanchim toyarai kortana Jezuk sodunk her sogllea gozalincher ami amchem dhean-mon lavn Jezukuch bhairanvk puro, ani teach porim amche lagim ailolea gorjevontam thaim ami add nodor korunk puro. Khorem mhonnlear Jezu sodanch amchea sangata asa. To amchea jivitant dusrea dusrea rupamni ievn bhett dita. Taka ami amchea jivitant vollkunchi goroz asa. Amcheo vatto nitt korp mhonnlear: koxttant ani akantant sampoddloleank adar divn tanchem vojem lhovu korop’. Amchim jinni bodlop ani dusreanchim mozot korop.

Oronneant arddatalo Juanv Bavtistacho to tallo lokamni aikolo ani to svikarlo. Hea sonvsarant legun zaite gorjevontanche talle ami aikotanv. Ami hea sogllea gorjevontank add nodor korun fokot Jezuk ravun boslear zai na. Heach talleamni amkam Jezu mellta. To amkam ekamekacho mog korunk apoita. Tor Krist ienneachea hea dusrea aitara ami panvl martana Deva lagim kurpa magum-ia ki, tannem amchea dolleantlem kudd’ddeponn, kanantlem bhereponn, toxench amchem nibor kalliz ani osokt mon bodlun taka favo te porim vatt toyar korun amchea jivitant apli ghottai dinvcheak.  

-          Jason Pinto, SDB 

KRIST  IENNEACHO POILO AITAR

XUBHVORTOMAN – LK 21: 25 – 28, 34 – 36

Mogachea bhavam bhoinnimno aiz thavn ami Krist ienneacho kall suru kortanv. Hea kallant Povitr Sobha amkam Jezu Kristachea ienneak toyari korunk ek sondhi dita. Latin bhaxent hea kallak ‘Advent’ mhonntat. Advent mhonnje ienvchem vo iennem.

Aichim tinui vachpam amkam Jezu Kristachea ienneak toyar ravcheak ulo martat. Aichea poilea vachpant Jeremias provadi Devan Izrael porje thaim kel’lea korara vixim sangta, ani koxe bhaxen Dev aplea ekleach ek Putak hea sonvsarant dhaddtolo mhunn bhas dita. Aichea dusrea vachpant Bhagevont Paulu Thesolonikarank boroilolea dusrea chittint, Jezuchea dusrea ienneak toyar ravcheak ulo marta. To Jezuk apnnachea jivitant svikar korunk formaita. Hem korcheak soglleamni aplem jivit bodlunchi goroz asa. Hea vachpam vorvim amkam kollun ieta ki, jen’na Jezu hea sonvsrant ietolo ten’na ami soglleamni maie-mogan ravchim goroz asa. Aichea Xubhvortomanant Bhagevont Luk Jezuchea iennea vixim amkam sangta. Kristachea dusrea ienneak ami amchem mon ani kalliz sodanch toyar dovorcheak to amkam sangta.

Mogachea ixttamno tumi ghoddie, Jezun darar ravun dar marchem chitr polloilam zanvk puro. Hench chitr polleun eka mon’xan tea chitrkarak vochun sanglem, “Tumchem chitr borem asa, punn ek vost mat tumi chukoila – tea chitrant aslolea tea darak khill nam.” Hem aikun tea chitrkaran mhonnlem, “tea darachi khill bhitor asa – zo konn Jezuk aplea ghorant ievkar dinvk sodt , tannem bhitorlean aplem dar ugddunk favo.”

Vhoi mhojea ixttamno Jezuk amchea kallzant ievkar dinvk ami legun amchem kalliz ugtem korunk favo. Jezu amche thaim ienvk sodta………………to amchem thaim biradd korunk axeta. Punn taka ievkar dinvk ami toyar asanv kai? Jezuk ievkar dinvk zai zalear ami amchem kalliz ani mon nitoll korunk favo. Amchi nodor otmik vostunchear asunk favo. Hea sonvsarachi axa soddun sorginchea vostunchi axa korunk favo.

Jezu sodanch aple hat vistarun amche khatir ravta. To amchem bhitor ienvk sodta. Tea chitrant aslolea Jezu porim Jezu amchea kallza darar ubo ravun tem ugtem korunk apoita. Tor Krist ienneachea hea bhagi kallant ami bhitor sortana Deva lagim hi kurpa magum-ia ki Kristachea ienneak ami aitim ravun amchem kalliz ani mon sodanch nitoll dovorcheak. Hea babtint Kum’sracho sakrament ghevn Jezuk bore bhaxen ievkar dinvk pavum-ia.

Cl. Kiran Nazareth, SDB

SOMIA JEZU KRISTACHI SOGTTA-SORVANCHEA RAZACHI DOBAJIK POROB

SADEA KALLACHO NIMANNO AITAR

25^th Novembre 2012

Aiz ami amchea Somia Jezu Kristachi Sogtta-Sorvanchea Razachi Dobajik Porob Somorombta. Jezu zavn asa sorga-sonvsaracho Raza. Punn tachi razvottki zavn asli seve-chakrechi ani mogachi, nhoi vhoddponnachi, nhoi sodrer bosun man melpachi. Aichea xubhvortomanant Pilat Jezuk ek proxn ghalta. Pilat taka vicharta, ‘Tum Judevancho Raza?’ Tenna Jezu portipallun mhonnta ‘Ho proxnn tum tujech ostongim vichartai vo dusreamni tuka sanglam dekun tum mhaka vichartai? Ho vichar Jezu korta kiteak, Judev lok eka Razak axetale. Tanche itihasant zaite Raza jiyele zoxe David, Solomanv adi. He Razamni Judev lokank zaite boreponn haddlem. Judev lok tanchea Razank sodach manan lektale. Tanchea somzonne pormonnem, ek Raza sodrer bosun aplem raj choloitolo aslo. Ani to Raza tankam hea vellar Romachea gulam ponnantlean nivartolo aslo. Tachea vorvim tankam suttka melltolim asli. Toxech amchea somestanche somzonne pormonnem ek Raza zavn asa, astik, podvecho ani ek manacho monis. Punn hea somzonnent Jezu bodol haddta, ani dekhunuch, lok Jezuk nakartat. Aichea disamni ami toxech kortanv.

Soren Kirkegaard ho ek totvxastri amchea fuddlean ek kanni ghalta. Ek raza aslo ani to eka cheddvache mogant poddta. Punn ti cheddum kheddea gavantlem ani eka sadea vagnnukechem aslem. Tancho mog itlo vaddta, ki tim dogaim kazar zanvk ievjitat. Punn hea vellar tea Razachea mukhar don proxn uprastat. Poilem mhonnlear, zori tor to Raza asun  kazar zalo zalear, taka tachea bhailecho niz mog onnbhovun kotthinn zatolem, kiteak tanche modem ontor astolo. Dusre vatten zori tor to Raza aple Razachi podvi nakarlum eke sadea monxa bhaxen jieta zalear, tachi bhail tachea sadeponnak lagun taka nakarpak xokta. Ho raza kosli pavl marta hache vixim amkam Kirkegaard sangina.

Oxi Jezuchi poristhiti zavn asli. Zori tor Jezu heram raza bhaxen jielolo zalear, tachem ani monxachem sombond khorem ani niz zavnk kottin. Kiteak Razak zaitem pautti sadea monxachi poristithi somzunk kothin zata. Punn, Jezu raza zaun khaltikaieche vatter chol’lo. Tachi razvottki zavn asli mogachi ani tacho khol mog amkam khursar dixtti poddta. Markuchea xubhvortomant Jezu sangta ki Monxacho put apunn-ui herank aple chakrek lavunk ieunk na, bogor heranchi chakri korunk aplo jiv somestanche soddvonne pasot divnk aila.(Mk. 10:45) Toxech Bhagevont Paulu Filipkarak boroilolea chittint mhonnta ki Jezu appnakuch khali kelo ani tannem monisponn ghetlem, ani ek gulam koso zalo.(Fil 2:5-11)..

Amkam Jezu tachi rajvottki hea disamni cholounk apoita. Ami zonn ekleani amchea jivita vorvim Jezuchem raj stapunk zai. Ami Jezuchi totvam apnnavn tachi govai hea jivitant divnk zai. He bhaxen ami soddvonn zoddtoleanv ani ami mog vistartoleanv.

RENVICK PEREIRA SDB

SADEA KALLACHO TET’TISAVO AITAR

XUBHVORTOMAN: Mk 13: 24 – 32

1941 vea vorsa Dezembrache 7ver, Japani soinikamni Hawaii Zunveacher aslolea ‘Pearl Harbour’-acher bomb ghalo ani Amerikachea xeka khal aslolea Filipins desacher ghuri ghali. Amerike senecho xotapoti Douglas McArthur Filipins des rakhtalo ani 1942, Marsache 11ver taka Filipinsacho zunvo soddcho poddlo. Punn Filipins soddche adim tannem ‘apunn porot ietolo’ mhunn lokank bhas dili. 1944, mhoje oddez vorsa uprant to porot ailo ani tankam bhettlo. To tea bhuincher denvlo ani tannem soglleank mhonnlem, “Ho polle, hanv ailom.” He ghoddnnuke vorvim Filipino lokank sovontrotai mell’li.

Khunna sodop amchea jivitant ek mhotvachi gozal zavn asa. Ami amchea jivitant dor eka panvddear khunna sodit astanv. Dekhik don mogi mogant poddtana , apnnak dusrean ful, SMS, bhett vo ani kitem jin’sa bhaxechem divnk zai mhunn tim axevn ravtat. Tech porim ek tornatto cheddo vo cheddum Devache sevent ek padri vo madr zavnk ievjitana, Deva lagim khunna magta.  Punn aichea Xubhvortomanant Jezu amkam xiddkaita ki, Bapa xivai ami konnakuch ienvcho asa tea disa vixim kollit aschem nam. Aichi tinui vachpam ontkalla vixim sangtat. Prokasavnnechea pustokant legun amkam hache vixim zaitem vachunk mellta. Amkam Jezu amchea bhavartha udexim  kallacho sonket kitem mhunn, parkunk formaita. Punn prokasavnnechim him borovpam ami zoxeak toxim vachunk favo nant, hanche bhitor liplolo khol-orth ami sodun kaddunk zai. Jezu amkam apunn ken’na ienvcho asa mhunn sangi nam………punn to amkam ‘apunn porot ietolo’ mhunn sangta. Hem mat khatrechem ki, to ietolo. Survil’le Kristanvamni ‘Maranatha magnnea’ vorvim Jezuchea porot ienneak othrekun ravlo ani Somia Jezu thaim aplo bhavarth uchcharlo: ‘Maranatha, Ie Somia Jezu’

Tor ami bhiranten ravunk favo nam ki  Jezu ietolo ani amkam  khast ditolo mhunn. Khorem mhonnlear ami Jezuk amchea jivitant ievkar dinvche vixim khont korunk zai. Jezu amche bhitor jiyeta, dekhun tachea iennea vixim khont korchi goroz nam. To amkam ken’nach sanddi nam. Jivitachi pavlam martana zaite nove gozali amchea jivitant ievnk puro. Hea vellar amchea kallza vorvim tachem utor ami niyallunk favo. To amkam xant xitoll udkacher vhortolo. To jerul ietolo, amkam khastichem formonn marunk nhoi, punn sukhachea ghorant pavunk. Aichea misa bolidant Deva lagim hich kurpa ani boll magum-ia, tachea ienneak favo te porim jivit jiyenvcheak.

-          Br. Michael Dias, SDB

SADEA KALLACHO BOT’TISAVO AITAR

(Mk 12 : 38 – 44)

Pritichea bhavamno ani bhoinnimno, aiz amkam Jezu khub khuxalkaiecho sondex dita. Poilea vachpant Elijah provadiachi ani eke vidhve bailechi khobor ami aikotanv. Dusrea vachpant Dev amkam aplo oporimit mog chakunk ulo marta.  Aichea xubhvortomanant Jezu Deva thaim khoro mog koxem porim amchean dakhoum ieta hache vixim amkam xikvonn dita. To Farizev ani dhormxastrianchear aplo rag ani aplem nirasponn dakhoita. Karonn tim lokank vhoddlea vhoddle updes ani kaide sangtale punn apunn zavn kaim kori nasle. Hea babtint Jezu amkam mhonnta ami khorea kallzan Devacho mog kelear ani tache upodes samball’lear amkam sorginchem raz melltolem.

Eka supurlea ganvant ek lhan firgoz asli ani tea firgozent ek padr-vigar ravtalo. To sodanch aplea firgozkarank bore updes ani suchovnneo ditalo. Apunn legun zaito vogot magnneant ani Povitr Pustok vachpant sartalo. Tachi mozot korcheak taka Bisp Saiban ek mania (chakor) dhaddlolo. To mania aplem kam’ bore bhaxen kortalo, punn to magnnem rozar korunk nokllo aslo. Padrik pollevn tacheant magnnem korchi urba pettli. To sodanch gupit apnna bhitoruch gunngunnun magnnem mhonnunk laglo. Padr-vigarak hachi tiddok disli. To apnna itleakuch chintunk laglo – ‘ho babddo kitem zanna magnnem rozar kitem mhunn. Itlim vorsam simnarint xikun ani akarnni zavn hanv mat zanna magnnem mhonnlear kitem mhunn. Dev mhojench aikotolo’. Hi gozal 10 – 12 vorsam meren chol’li. Xekim padr-vigar zannto zavn moronn pavlo. Taka khatri asli ki apunn nokkich sorgar vetolom mhunn. Sorgar tor to gelo. Punn sorgar aplea manaik polloitana taka ojap dislem. To devdutank vicharunk laglo, “Hem kitem! ho babddo hanga koso pavlo gai– magnnem rozar to kitem zanna.” Taka zap divn khud’d Devan mhonnle, “Tujem sarkem, tache poros tujem magnnem borem aslem, punn tujea magnneant tujim bhognnam nasli, tum fokot pustokantlean boddboddun kitem-kitem mhonntalo. Punn to tuzo chakor khorea kallzan, aplea sopurnn jivan mhoje lagim uloitalo.” Vhoi mhojea ixttamno ami chintunk puro ki, zaitem ginean ani pustokam, xastram vachun ami Devache nodrent vhodd asunk puro. Punn khori gozal mhonnlear Dev amchem kalliz polloita, ginean nhoi. Je porim aichea xubhvortomanat te gorib vidhven aplea thoddeantlean dan-pettent aple poixe ghale, tech bhaxen Dev amkam amche kallzache kholaie thavn mog korunk ani aple updes pallunk ulo marta. Magnnem mhonnlear ek sombond – ekameka lagim Devacho ani mon’xacho sombond. Hoch sombond magnnea vorvim amchean ghott korunk zata.

Aichea hea misa bolidant vantto ghetana Deva lagim hich kurpa ani dennem magum-ia, Deva thaim amcho mog vaddun ami pelea thaim Devacho mog porgott korcheak.   

– Cl. Austin Fernandes, SDB

SADEA KALLACHO TISAVO AITAR

(MK 10: 46 – 52)

Pirayent vadd zatana amkam dista ki zaitea gozalinchi amkam purayen mhaiti nam. Tornattponnar amkam distalem ki amkam sogllem kollit aslem. Tor khoim gelem tem sogllem ginean? Ken’na ken’na amkam hem somzunkui kotthinn zata. Jen’na lok amche kodde aple koxtt sangata ten’na ami tankam khinnatmok (instant) upai ani suchovnneo dinvk sodtanv. Atanchi poristhiti khub veglli. Amchean dusreanche koxtt somzunk zatat punn tharavik upai dinvk zanvche nant. Zoxi zoxi amchi zannvai vaddta, amkam bhogta, Devacher patievn ravchem chodd faideachem.

Kudd’dde monis sodanch dusreancher patievn aplem jivit sartat. Dusrancher patievn, tancho adar ghevn akh’kem jivit jiyenvchem kitem mhunn ghoddie amkan kollchem nam. Zori atanchea novea tantrik udorgotik (technological development) lagun kudd’ddeank legun zaitim daram ugtim zaleant, tori astana tankam dusreancho adar ghenvchoch poddta.

Aichea Xubhvortomanant ami aikotanv koxem Bartimev nanvacho eklo kudd’ddo sodanch dusreanchea adarar jiyetalo. Kudd’ddo aslo tori tache kan bore asle. Jezu Nazretkar patsar zanvchi khobor tachea kanar poddtoch tannem taka ulo marlo. Jezun tachem aikolem. To kudd’ddeponnantlo boro zalo. Ani magir Bartimev Jezucho pattlav korunk lagta. Toi Jezuchea xisam borabor Somiacho pattlavdar zalo.

Aichea poilea vachpant Jeremias provadi amkam tea disa vixim sangta, jen’na thontte cholunk lagtole ani kudd’dde polloitole. Jezu Krista vorvim tea disachi survat zali. Jeremiasacho provad purnn zalo. Jezun dil’li nodor fokot sonvsar pollevnkuch nhoi, punn bhavarthachea dolleamni Devak pollevnk. Tachim ochoriam dekhunk. Bartimev Jezucho pattlav korunk laglo. Chintun polloiat kitli khuxi zali astoli Bartimevak zannem konnachoi adar ghe nastana apunn zavn Somiacho pattlav kelo. Anikui kholayen ami hea ghoddnnukecher nodor marlear amkam gomtolem ki, jim Devachem hajirponn pollevnk xokonant, tim Devacho pattlav korunkui xokonant. Devachem asnnem svikar korun tacho pattlav korun, peleachi seva korop zavn asat ekach sutan gunthlolim Kristi sotam.

Juanvachea Xubhvortomanant nov’vea ovesvorant ami Jezuchim him utram aikotanv, “Hanv ailam kudd’ddeank dixtt dinvcheak”. Kallokant jiyetoleank uzvaddachi kirnn zavn asa Jezu. Thoddea gozalimni ami zavn asanv te kudd’dde zankam nodor zai, jim dolle asunui kudd’ddim.    Amkam legun amchea jivitant vatt zai, dika (direction) zai. Ani hi vatt zavn asa Jezu, zo mhonnta, “Vatt, sot ani jivit hanvch”. Hi vatt pollevncheak amkam bhavarthache dolle zai. Tor aichea hea misa bolidanant Deva lagchean hich kurpa ani ghottai magum-ia. Bartimeva bhaxen Devan amchei dolle ugoddcheak Tachem dennem magum-ia.  

- Jonathan Ribeiro, SDB

SADEA KALLACHO EKUNNISAVO AITAR

(Mk 10: 35 – 45)

Aichea Xubhvortomanant ami amcheach jivita vixim aikotanv – hoi tuji ani mhoji gozal. Ami aikotanv koxe bhaxen Jakob ani Juanv Jezu sorxim ievn apnnamni, eklean tachea uzveak ani dusrean tachea daveak boslolo zai mhunn vinonti kortat. Punn Jezu zap di nastana tanchem  mukhar dusroch ek prosn ghalta – Ji khals hanv piyetolom ti tumchean piyeum-ieta? Tannim ‘vhoi’ mhonntana Jezu tankam somzoita ki, tanchean toxem korum-ietalem zait, punn apnnachea daveak ani uzveak boska dinvchi podvi apnna kodde nam. He xis kitem korunk sodtale gai? Te podvek ani odhikarak lobdal’le (axetale). Amchea-i jivitant ghoddie oxem zanvk xokta. Ami chintunk puro ki, amkam fokot podven ani odhikaranuch amchim khori vollok dakhoum-ieta. Hea ghoddnnuke vorvim Jezu amkam kitem sangta zait? Podvi ani odhikar eka Kristanvak sobona! Eka Kristanv bhavarthean tachi axa korop favo nhoi! Khorem mhonnlear podvi ani odhikara vixim  Jezuchi somzonni  vegllich asli. To sangta – zo konn vorto zanvk sodta, tannem khalto zanvk zai…….tannem chakor zanvk zai, zo poilo zanvk sodta, tannnem soglleancho gulam’ zanvk favo. Jezu pormannem ‘fuddarponn’ mhonnje kitem, hem xubhvortomankar Marku amkam sangta. Jezuchea orthan ‘fuddarponn’ mhonnlear eka chakrachem fuddarponn – servant leadership – eka fuddarean heranchi chakri korunk favo. Zor tum fuddari vo podvedar zanvk sodta zalear  tujean soglleancho sevok/chakor zanvk favo. Hich dekh Jezun amkam aplea jivita vorvim amkam dili. Jezu zo zavn aslo raiancho rai, amcho Dev, tannem aplea mon’xa soimban amkam eka chakrachi dekh dili. Bhagevont Pauluchea utramni mhonnche zalear – zori tori to Dev aslolo, Tannem aplem Devponn soddun, eka chakrachem rup ghevn apnnakuch rito kelo. Amcheanui Deva bhaxen zanvk Dev, monis zalo. Jim doivik totvam  asat – doyallai, sonsnnikai, xantikai, mogallai, bhogsonnem, adi. ami legun amchea jivitant apnnavncheak. Vhoi, Dev monis zalo ani amchem modem jiyelo ani tannem soglle koxtt ani opman sonsle.

Aichea poilea vachpant Izaias provadian sanglolea pormannem, “Amchim patkam ani onit tannem apnnacher ghetli.” Vhoi ixttamno Jezu amcho ‘hero’ to amkam ek dekh, ek udaronn zavn asa. Tannem aplem fuddarponn aple seve-chakrechea vagnnukent amkam dakhoilim. Dusreanchi seva-chakri korop mhonnlear tancho ami mog korop, tancho samball korop, tanchi zotnai ghevop, kherit bhaxen amchea asrea khal aslolea thaim – ofisant, iskolant, ghorant…..

Dev amkam aplea Puta Jezuchi hich dekh ghenvk ulo marta. Tor aichea hea misa bolidanant Deva lagim hich kurpa ani dennem magum-ia.  

Cl. Joel D’souza, SDB

SADEA KALLACHO OTT’TTAVISAVO AITAR

Xubhvortoman: Mk 10: 17 – 30

Bhalwant Singh Dalwari nanvachea eka IFS (Indian Foreign Services) officer-achem magnnem hem porim zavn aslem: “Jen’na mhaka Tum mell’loi, ten’na ‘mhojem’ ani ‘mhojem nhoi’ oxem urunk nam, sogllem mhojench zalem”. Hea magnneantlean amkam tannem aplea khaxelea jivitant vinchun kaddlolea gozali vixim niyall korum-ieta. Karonn IFS-achi  seva soddun tannem koddkararam (kuxttrogi – lepors) khatir aplem akhkhem jivit somorpilem. Tem-i aplea maim-ganvant Ponjabant nhoi, punn poixilea, Maharaxttrantlea eka supurlea khedde ganvant. Hea koddkarancho ani tacho kosloch rogtacho sombond naslo, tori astana somaz seveche bhavnen ani ghoddie Devachea mogan, Devacho dut koso to tanchem modem vavurlo. Povitr Sobhechea toxench amchea mon’xa itihasachea pustokamni ami vachtanv koxe porim zaite girest, budhvont ani gunnvont monis apli soglli girestkai ani budhvontkai tyagun lokache seve khatir vavurle. Santam-bhoktanchea jivitacher ek nodor marlear zata. ‘Devacho pattlav korcho mhonnlear apnnakuch sanddun nirontor Tachi seva korchi’. Hich gozal aichea vachpamni amkam spoxtt zata.

Aichea Xubhvortomanant ami vachtanv ki koso ek girest tornatto Jezu sorxim ieta ani apnnan sasnnachem jivit mellun ghevncheak kitem korunk zai mhunn vicharta. Hea mon’xak  khorea kallzan sasnnachem jivit bhogchi khuxi asli. Dekhun jen’na Jezu taka Devache updes pallunk sangta to Taka zap divn mhonnta ki apnnan he updes bhurgeponnar thavn barkaien pall’leat. Hebrev-Zudevi  dharmik porompore pormannem Devache updes ani nem-kaide pallche mhonnlear Devacho khoro mog korcho’ oxi tanchi somzonni asli. Ani hech khatir Jezui taka updes pallunk formaita. Punn magir Jezu taka apli girestkai soddun, sogllem vikun goribank vanttunk sangta. Hem aikun to khontest zalo. Kiteak to khub girest aslo ani apli girestkai soddunk to kobul naslo. To Jezucho pattlavdar zavnk pavo nam. Jezuchem utor aikun tacho khoro pattlavdar zavnchem mhonnlear ek  kherit apovnnem. Ani hea apovnneak pallo divncho mhonnlear ek nivodd (choice). Hache vixim ami aichea poilea vachpant aikotanv. Solomanv Rai Deva koddchean apnnak zannvaiechem dennem magta. Taka-i zaiteo her gozali vo vostu zoxi – girestkai, bori bholaiki, razvottki, bollixtt sena, adi. vicharunk ieta asleo. Punn tannem ek nivodd keli ani hea sabar vostum modem zannvai vinchli. Ami amkanch vichar korum-ia: Amchi nivodd ami koxi kortanv? Ap-svarthiam bhaxen apnna khatiruch kai nisvarthponnim heranchea boreponna khatir? He nivoddnnek legun zaiteo gozali chittkun asat. Hi nivodd kortana amkam amchea jivitant zaiti bodolnni haddchi poddta. Karonn zoxe ami aichea dusrea vachpant aikolam Devachem utor eka pazlolea torsadi bhaxen mon’xachi kudd ani atmo doxim korun soddta. Amchea kallzak Devachem  utor topta. Amchem akhkhem jivit haloita ani amkam ek nivo monis zavnk ulo marta. Tor Dev amkam kitem sangunk sodta gai? 

Tin gozali hangasor amchean niyallunk zatat.

1.      Poile suvater – Dev amkam aplea utra vorvim apoita.

2.      Dusre suvater – Devachem utor manun ghenvchem mhonnlear ek nivodd. Tachea uleak hoikar divop.

3.      Tisre suvater – Devachem utor itlem bollixt ki ami amchem akhkhem jivit bodlunk tem ulo marta.

Tor aichea hea misa bolidant bhag ghetastana, Deva lagim tachem utor aikunk, somzun ghevnk ani tem sodanch pallunk Tachi kurpa ami boll magum-ia. Tech bhaxen adlea birestak (Otubrache 11ver)  ami Bhavarthachea vorsachi uktavonn keli. Hem voros Otubrache 11ver thavn fuddle vorsache 24 Novembra meren ami somarombhtoleanv. Hea Bhavarthachea vorsa amcho bhavarth vaddovnk  ani hoch amcho bhavarth dusrankui porgottunk Devachem dennem magum-ia.

-          Jason Pinto, SDB

SADEA KALLACHO SOT’TAVISVO AITAR

(MK 10:2-16)

Aichea poilea vachpant kazari jivitacher nodor ghalta. Amchea jivitant zaite sombond ami onnbhovtanv. Zoxe kuttumbik sombond, ixtagottiche sombond ani kazari sombond. Tantuntleant sogllea-von ut’tom’ mhonllear kazarachem sombond. Zor amkam amchea jivitant asat title sombond samballunk zai, tor ami Devak tantunt bhag divnk zai. Bisp Fulton Sheen mhonntalo ki kazarant tin monis asunk zai - dhadlo, bail ani Dev. Khore mhonnlear zor amkam amchem kazari jivit khorench sukest korunk zai zarlear, tor ami Devacher sodanch bhavarth dovrunk zai ani ekameka kodde visvaxi ravnk zai.

Eka rajeant ek raza aslo. To ek dis aplea mahalachea bagent bhonvddi martalo. Tea bagant ek tollem aslem. Tea tolleant to fator uddovpak laglo. Te fator udkant uddoile mhunn, udkant budd-budde ietale. Te budd-budde pollevn tachea motint ek vichar ailo, to mhonnunk laglo ki hea budd-buddeam porim mhozo mog mhojea ghorkarn lagim zavnk zai. Zoxem porim hea budd-buddeank survat ani xevott na toso mhozo mog zavnk zai. Dusrea disa tannem aplea bailek ek mudi keli ani ti aplea bailechea bottant ghali ani mhonllem, “Hi mudi zavn asa mhojea mogachi ek khunna. Amchea jivitachea dukhant toxench sukhant hanv tujexix visvaxi ravtolom. Oxe toren mudi divpachi rit suru zali. Mudi mogachi bhasavnni khunnaita.

Jezu aiche Xubhvortomanant ek khor xikovnni dita ki Dev kazarant ekvott stapta.  Ho ekvott mon’xan doxim korunk zaina. Ani zori tor monis ho ekvott moddunk sodta tor to Deva add veta. Dekhunuch je kazari astat, tannem aplea kazari jivit sodach samballunk zai. Koxem porim te ami samballunk zai? Poilem mhonnlear ami Devak amchea kazari jivitant suvat divnk zai. Jezu amchea kazari jivitachi buniad zavnk zai, ani sodach tanche lagim ami ekvottant magunk zai. Dusrem mhonllear amchea kazari jivitant ulovnnem gorjechem. Ghovan ani bailen ekameka kodde aplim bhognnam, chintnam ani kallzache otrek uktim korunk zai. Ten’na amcho mog vaddta, kiteak ami ekamekak somzunk xoktoleanv. Tisrem mhonnlear ami zanna zavnk zai ki mog koxttant ani seve-chakrentlean upzota.  Ghovan aplea bailecho mog sodach sevent korunk zai. Toxech bailen aplea ghovacho mog teach ritin korunk zai. Jen’na apleponn, vo gorv, vo rag utpon zata ten’na mog unno zata. Jezu mogacho khoro sakxidar ani muniari. Tannem khursar morun mogacho khoro orth dakhoilo.

Toxench amcho mog bhurgea porim asunk zai. Bhurgim zoxim aplea avoi-bapaichea hata-khal aplem sogllem jivit somorpitat, toxench ami amchem jivit Devachea hattant somorpunk zai. Dekhunuch Jezu lhan bhurgeank addaina, kiteak Sorginche Raj tanchem. Bhurgim kazareank toxench ama somestank ek khoro dekh. Zori tor ami tancho dekh ghevn amchea jivit sarlear ami odik sompurnnponni amchem jivit jiyevnk xoktoleanv. Tor aichea hea misa bolidanant Deva koddchean hich kurpa ani dennem magum-ia.

Cl. Renvick Pereira, SDB

SADEA KALLACHO SOVISAVO AITAR

Dogam xetkareanchi ek kotha asa. ti mhollear oxi: Dogui koxtt korun, gham' varoun mogan xet roytale. Tea vorsa tannim dogaimni xet roylolem. Punn ekleachem xet borem utorlolem polleun dusro chintunk poddta. Dubhavaviret dogaim xetkareamni ekech torechem bim vomplolem...ekech torechem sarem ghatlolem adi. Tachem xet borem hirvem asa, lamb asa ani konnos yeunchem zalam tem polleun nirddukayen bhorta. Tech porim niraxi-i zata. Magir to aplea xetant veta ani aplea xetant asloli dor ek rompi matxe voddun lamb korta. Oso khub vell vavr korun, aplem xet lamb zalam te polleun to khuxal zata. Ghora portotana taka tacho ek ixtt bhett'ta ani aplem xet borem zalam mhonn sangun, taka gheun xetant yeta. Xetant pavtoch te dogui tthottak zatat. Xetak dukhapot zaun sogllem xet bavun padd zaun gelem. Sosnnikai naslolea karonnan aplem xet vegim vhodd zaunk kaddlolo upay nirfoll zaun taka khub luskonn zalem. Sosnnikai amchea jivitant ekdom' mhotvachi. Hea sonvsarant jiyetana ti apnnaunk ami dor eklean proyotn korunk zai.

Lokgonntichea Pustokantlea vachpant, Mattva lagim zomlolea 70 zanntteancher Sorvespora Devacho Atmo denvlo ani magir konn porim te Devacho son'dex diunk lagtat ti khobor asa. Eldad ani Medad je Pennea-moidanar asle tancherui Atmo denvta ani te-i son'dex porgottunk lagtat. Eldad-ak ani Medad-ak son'dex diuncho bond kor mhonn Joshua Moizesa lagim magta. Tednam Moises taka oxi zap dita, 'Mhoje pasot tum nirddukai kortai? Sorvesporachi soglli porza Provadeanchi zal'li zalear!' Nirddukai mon'xachea jivitant aslear kitlem vaitt zaum yeta tea vixim amkam xikovnn mellta. 'Guruji, amcho pattlav korinaslolo ek monis Tujea nanvan devchar kaddtana ami dekhlo ani to amcho pattlav korina mhonnun ami taka ami mona kelo' (Mk 9,38). Dhormdutanchea monant apunn vichun kaddlole ani Jezuchea nanvan fokot apnnachean ochoriam-vizmitam korum yetat mhonn chukicho somoz aslo. Dekhun, dhormdut Juanv-an Jezuk hi voili khobor sangli. Punn Jezuchi protikria tokhnnai korpa sarkhi asli. Jezu mhollem, 'taka mona korinakat, kiteak Mhojea nanvan vizmit kortit tim kednanch rokddim Mhojer vaitt ulounchim nant. Tor amcher add nant tim amchea bhaga asat (Mk 9, 39). Devachi yevzonn xarthi pavounk soglleamni tenko diunk zai. Girestanchem udaronn diun tim konn porim Devachi yevzonn moddun uddoitat ti khobor Sant Jakob-ache chittint asa.

Amchea jivitant asloli nirddukayecher tabo dovorunk ami xikunk zai. Nirddukaye vorvim dor ekleachea jivitant toxench dusreanchea-i jivitant khub vaitt zaum yeta. Ami sogott Devachim bhurgim. Soglleam sovem mogan cholunk ani eka-mekak manan respetan vagounk ami vavrunk zai. Ami katolkam, ami Jezuchim pattlavdaram mhonntoch amich sorgar vetolim mhonn sopnachea sonvsarant ami jiyeunk upkarona. Dhormdutamni ti chuk keli ani dusreank mona kele. Dusrea-i dhormancho lok amche modem jiyeta tednam tankam kikont korpachi tallnni vattaum-ia. Dusrim unch sortat tednam tanche vixim nattkai-nirddukai korchi nhoi, bogor khuxal zaun Dhonia Devak vakhannuk xikum-ia. Jezun Aplea Xisank sosnnik zaunk ulo kelo. Ami-i ho ulo amchea kanar gheun sosnnikayen jiyeunk proyotn korum-ia.

(sermon contributed by Fr. Ave Maria)

SADEA KALLACHO PONCHISAVO AITAR

Krista thaim mhojea mogachea bhavam bhonnimno, amkam Devan Tacho mog korunk, borem jivit jiyevnk ani taka mhoima divnk rochlam. Devan amkam vinchun kaddlam ani ek novi porza koxi nem’lam. Ami novea korarantli Novi Porza zavn asanv. Adlea Korarachea Israel porza modem Devan kel’leo soddvonnecheo ghoddnneo Dev amcheai jivitant korit asa. Ani he vorvim ami sodanch Sorvespor Devak manta toslem jivit jiyevnk To amkam ulo marta.

Aichea tinui vachpamni amkam gomun ieta ki zo monis khalteponnim, doyallponnim ani maie-mogan jiyeta to sodanch khoro mog ani khori xanti hea sonvsarant ximpddaita. Zo monis heranchi beporva korta ani apnnachench chint’ta, dusreancho opman korta ani ap-suvarthi zata, to monis sodanch amchea somazant osomadhan ani khotteponn haddta. Mon’xachea khotteponnak lagun xanti nam. Xubhvortomanant Jezu sangta ki, zor tuka sorginchea rajeant bhitor sorunk zai zalear, tuvem ek lhan bhurgea bhaxen khalteponnim maie-mogan jiyevnk zai. Dev patkak kanttallta punn patkiak nhoi. Dev eka borea gonvllea bhaxen sanddun gel’lea xelliek sodun kaddta ani taka sarkea ani nitt vatter haddta. He porim Dev patkiank bhagevontponnachi jinn jiyevnk ulo marta.

Dev amkam amchem patki jivit bodlunk zaite sond dita. Istihasachea panamni ami Hitler-a vixim aikolam. Koxe porim Hitleran zaitiank jivexim marun,  xekim toch jivghat korun melo. Tech bhaxen ani Maghad rajeachea Ashok Raia vixim vachtanv. Tannem legun zaitiank piddapidd dili ani khubxea lokank marun uddoilim. Punn aplea jivitachea nimannea vogtar tannem apli jinn bodol’li. Boud’dh dhorm apnnavn tannem Bharota bhair hea dhormacho prosar kelo. ‘Ohimsa’ totvacho to porgottnnar zalo. Aiz legun itihasachea panamni tachem nanv bhovmanan omor urlam. Povitr Pustokant legun Jezuk nakarpi Pedru, Jezucho lagxilo porgottnnar zalo ani Povitr Sobhecho poilo voilo Pap Saib zavnk pavlo.

Dev amkam legun amchem jivit bodlunk ulo marta. Patkachea pasantlean amkam soddovnk Jezu sodanch otrekun toyar asa. Amchean fokot tachea uleak pallo divn, Tachi kurpa ani mozot bhogunk favo. Ami Jezu thaim ek pavl marlear to amchea thaim dha pavlam marta. Jezu bhov doyall ani konvollo. Tachea doyallaichi ani mogachi ub ami amchea jivitant onnbhovum-ia. Tachea utrak man divn, borem jivit jiyevncho proyotn korum-ia. Aichea hea misa bolidant Deva koddchean hich kurpa ani ghottai magum-ia.

Cl. Patrick Dias, SDB

SADEA KALLACHO CHOVISAVO AITAR

Ovchituch mhojea ek ixttachi avoi moronn pavli. Haka lagun tachea akhkhea kuttumbak bhov dukh bhoglo. Tim hea mornnak toyar naslolim. Taka hanvem ek sondex dhaddlo ani mhojea magnneachim khatri dili. Mhaka zap divn tannem mhonnlem ki tachi avoi fokot tachi avoich nasloli, punn ek bori ixttinn and sangatinn legun zavn asli. Tache avoichi legun aplea puta khatir zaitim sopnam ani yevzonneo asloleo. Avoichea mornna vorvim  heo soglleo nas koxeo zaleo. Mhaka tannem boroilolo nimanno sondex zavn aslo: Khoim asa Dev hea vellar? Tannem oxem kiteak kelem? Hi gozal fokot mhojea ixttachi nhoi, amchea jivitantui oxem ghoddum-ieta. Koxttamni, dukhamni, orixttamni ami legun oslech prosn Deva lagim vichartanv ani apnnakui vichartanv: Khoim asa Dev?

Aichea Xubhvortomanant Jezu aplea xisam mukhar bhavartachho ek prosn vicharta. Somi vicharta, “Hanv konn mhunn lok mhaka dhortat?”. Tachea pattlavdaram modlea thoddeamni taka Juanv Batist, Elija ani provadiantlo eklo mhunn pacharlo. Magir Jezun aplea xisank toch prosn vicharlo. Ten’na Pedrun zap divn mhonnlem, “Tum Krist”. Grek bhaxent ‘Krist’ vo Hebrev bhaxent  Mesias’ mhonnlear  soddvonndar. Judev lok eka soddvonndarak otrekun ravtale, zo mhoimen ani dobajean ievn, tankam Romi razvottentlean soddoitolo. Punn Jezu ek dusrech torecho soddvonndar aslo.To Romi razvottecher zoit vhorunk ievnk naslo, punn koxtt sonsun, amchea patkanchea farikponna khatir khursar morunk ailolo. He vorvim tannem aplea Bapaichi khuxi pall’li. Hoch provad Izaias provadian aichea poilea vachpant amkam kel’lo amkam aikunk mellta. ‘Mhaka martoleank hanvem mhoji fatt dili, mhojem khadd oddun kaddtoleank mhoje pole dakhoile. Mhojeo kenddnnio kortale ani mhojer thimpi uddoitale ten’na porian, hanvem mhojem tondd pelan kaddunk na.’

Ami zannanv Jezu amchea khatir khursar melo. Punn tachem moronn khursa meren urunk nam. Aplea punorjivontponna vorvim tannem mornnacher zoit vheli. Tori astana tannim hi Jezuchi bori korpi xokti vollkhunk nam. Amchea jivitantui amchea koxtta-dukhant ami Jezuk vollkhunk pavonant. Amche koxtt Devachea hatant ghalunk ami visortanv. Mukhar Jezu amkam sangta,     “ Zor konnui mhozo pattlavdar zavnk sodta zalear, tannem apnnakuch sanddun, aplo khuris ghevn mhozo pattlav korcho”. Ami sogllim hanga hea misak zomleanv. Jezuchea uleak ami ‘vhoi’ mhunn svikarla. Jen’na ami Kristachi kudd ani rogot xevtanv ten’na ami Jezuk amchea jivitacho dhoni mhunn svikartanv. Amkam jem boreak poddta tem Devak kollit asa. Mhojea mogachea bhavam bhoinnimno ami Devacher amcho bhavarth ghott korunk zai. Tachem hajirponn amchea jivitachea dor eka ghoddnnent ami pollevnk favo. Dekhun Deva lagim ami magum-ia ki Tannem apli kurpa amcher ghalun, Tachi khuxi amchea jivitant sodanch pallunk ami toyar ravcheak. ‘Deva mhaka tujer visvas asa , mhojea bevisvasak tuzo adar di’

Cl. Joel D’ Souza. SDB 

SADO KALL – TEVISAVO AITAR

Vixoy: Jezun sogllem borem kelem.

1lem Vachop: IZ 35, 4-7a; 2rem Vachop: Jak 2, 1-5; Xubh: Mk 7, 31-37

Ek Sfurthi: Helen Keller hi ostori zolman thaun kurddi, bheri ani moni asli. The story of my life hea tichea pustokant ti aplea jivtachi khobor bariksannen chitarta. Jednam aplea lagim lokam kodde sompork sadunk (communicate) ghoddonaslem tednam apunn bhitorlean ragan xiztalim mhonn tea pustokant ti ul’lekh korta. Ek dis Miss Fuller hinnem Helen-ak ulounk xikovpachi pod’dot sodun kaddli. Tinnem Helen-acho hat aplea mukhamollacher dovorlo. He toren Helen-achean tichea  onttancho ani jibecho thav gheunk zatalem. Magir ti ek utor uloytali ani Helen aplea bottanchea adaran ontt ani jib konn porim haltat tacho sumar kaddtali. Magir Helen tech porim aple ontt ani jib dovortali ani tem utor mhonnonk proyotn kortali. Zaiti practice kelea uprant, Helen ulounk xikli. Tednam tiche khuxalkayek xim’mer uronk na! Ti aplea pustokant oxem boroyta, ‘ hanv khuxalkayechea humalleamni porot porot mhonntalim –atam hanv moni nhoi’. Helen-achi khobor monant dhorlear, aichea Xubhvortomanantlea bhero ani mono aslolea mon’xachi poristhiti amkam odik bori somzotoli.        

Devachem Utor: Izaias Provadi aichea Poilea Vachpant, Soddvondar yeun kitem ghoddtolem tem spoxtt korta. Tachea yennean monis khuxalkayen bhortolo ho bhorvanso tankam dita. Mon’xak bhorvanxachi chodd goroz. Kiteak mhollear ho lok gorib aslolo ani Babiloniecho raza tancher zobordosten raj choloitalo. ‘Bhivkure dhir ghetat, kurddeanche dolle ugoddtat, bhereank aikum yeta, mone gayonam gaytat ani thontte khuxalkayen uddnnam martat’ oslea utramni to tankam bhorvanxan bhorta. Soglleam sovem ani odik korun dublleam sovem vegllochar korum noye mhonn Sant Jacob dusrea vachpant ugddas korta. Durbollank kochro zal’lea porim lekhop ekdom’ chukichem mhonn xiddkavnni diun Sant Jacob tankam-i manacho zago diunk zai mhonn sangta. Kiteak dubllim bhavarthan girest ani Devachea Rajeachim daiji. Xubhvortomanant, Jezu eka bherea-moneak pekovnni dita. To tache kan ugoddta ani teach borabor tache jibecho bandpas sutt’ta. Lok eka tallean mhonn, ‘Tannem sogllem borem kelem’.

Amcho Zobab: 

·         Jezu apunn Izraelacho Soddvonndar mhonn dakhoita. Jem kitem Izaias Provadean Mesias hache vixim bhakit kelolem tem Jezu sovem ghoddon ailem. Jezu bhereank aikum-xem korta ani moneachi jib gavum-xi korta.

·         Jezuk dusreancho huso asa ani Taka dusreanche churchure distat mhonn ugddapem zata. Lok bherea mon’xanchim sompeponnim fokanddam kortat. Kurddeank tori lok churchurta. Jezu hea bherea-moneak kuxin vhorun boro korta.

·         Zaite pavtti amche lagim magnnem korunk ghoddona, Deva lagim guptim ulounk amchean zaina, Devak amchem kalliz uktem korunk amkam kotthin zata. Dev amche lagim uloyta tem amchean aikunk zaina. Tednam hea bherea-moneachi dekh amchea dolleam mukhar dovrun tache porim ami Jezuk sodunk gorjechem. Tachean amkam borim korunk zatat.

Cl. Michael Dias, sdb

SADEA KALLACHO BAVISAVO AITAR

Krista thaim mhojea bhavam-bhoinnimno, ek pavtti eke bondkhonnint eka Romi odhikarean eka Zudev Rabbik (Jewish Rabbai) ghal’lo. Thoinsor taka khann, jevonn ani udok gorje purtem melltalem. To Rabbi bondkhonnint ailolo ten’na jivan boro distalo. Punn zoxe dis patxar zale tachi bholaiki bori na zali. To samko osokt zavnk laglo. Taka topasunk eka voizak/ dotorak tannim apoilo. Topasnni korun tea dotoran aplo report dilo. Dotora pormannem tea Rabbichea kuddint udkacho promann (proportion) unno zavn gel’lo. Hi gozal aikun bondkhonnichea odhikareak ojap dislem. Karonn to zanna aslo ki dor disa taka gorze purtem udok melltalem.  Sot kitem hem polleuncheak ani tacher barik nodor dovorcheak tannem don xipai dovorle. Dusrea disa jen’na udok ailem ten’na Rabbin sodanche bhaxen aplem angovlem kaddlem ani haddlolem udok ghevn aplem tondd, hat ani paim to dhuvnk laglo. Jen’na xipaiamni taka vicharlem  apunn oso kiteak korta mhunn, tannem tankam zap divn mhonnlem, “Hi amchi dharmik chal, amchi porompora, ti mhojean koxi soddum-itea”. 

Mhojea mogacheamno aichea xubhvortomanant amkam Jezu Krist oslech chali-ritim vixim xiddkaita. Jen’na Jezu ani tache xis hat-paim dhui nastana jevnnak bostat, ten’na Farizev ani Dhorm’xastri tankam ttika korun mhonntat ki te aplea purvozancheo chali-riti palli nasle. Hem aikun Jezu tankam Izaias provadiachea utramni sangta ki koxe porim hi porza fokot vonttamni mat Devachi stuti korta, punn tanchim kallzam Deva thavn khub pois asat. Karonn to zanna aslolo ki he Farizev ani Dhorm’xastri xistin ani khor ritin tanche kaide ani chali palltale, punn peleachi seva korunk ani herank upkar korunk tankam puttvo naslem. Dekhun Jezu tankam budh divn mhonnta ki jem Devak zai tem tanchem nitoll-nirmoll kalliz, ani nhoi tannim pall’lole kaide. Devak zai to mog ani doia, nhoi bolidan.

Aichea poilea vachpant ami aikotanv koxe bhaxen Moizes Izrael porjek apnnamni jivont urche khatir ani bhasailolea bhiunt veche khatir kaide dita ani tankam te pormannem jieunk sangta. Kaide vorvim amkam amchem jivit xistin ani xegunnamni  jieunk zata. Punn kudd’ddea  Farizevam porim jieun kosloch upeg na. Ami jen’na kaide palltat ten’na tanchim muliam (values) kitem, tem poilem somzun ghevnk zai. Amche jivitacherui ek nodor marum-ia. Ami legun zaite kaide, rit-rivaji palltanv. Punn kiteak? Konna khatir? Lokank dakhovnche khatir vo Devachea moga khatir. Dor aitara ami misak ietanv. Kiteak lagun? Aitaracho kaido pallcheak kai Devachea mogak zap dinvcheak? Taka vakhanncheak? Thodde pavtti ami misak ietanv, magnnem-rozar kortanv, soglleam novenamni vantto ghetanv, punn ami kitlem zann peleachi seva kortanv? Amcheach ghorchea lokank ami maimogan polletanv kai? Ami kitle zann misam aikunui ekamekak bhogsunk toyar nanv. Kiteak? Kaide tor pall’le punn tachim muliam?

Tor bhavam-bhoinnimno az amkam Jezu amchem ontoskornn ani kalliz nitoll dovrunk ulo marta. Bhaileanuch nitoll asun kaim faido na, bhitorlea atmik gozalimni legun ami nitoll-nirmoll asunk favo. Dekhun hea misa bolidant ami Sorvespora lagim magum-ia ki, ami bhailea gozalincheruch chodd mhotv di nastana amchim kallzam ani ontoskornnam nitoll dovrun Kristache khore pattlavdar zanvcheak.

-          Cl. Kiran Nazreth, SDB 

SADEA KALLACHO EKVISAVO AITAR

Eka supurlea rajeant ek rai ani ranni aplea opurbaiechea eka puta borobor ravtalim. Aplea putachi tankam khub khont asli, dekhun tannim taka pordesant aplea vollkhichea eka sombondi ani ixtt raiachea ravllerant (palace) ravunk dhaddlo.  Porjechea lokant kunvorachi vollokhuch nasli, karonn tannim taka ken’nach polleunk naslo. Zaitim vorsam tea raiachem rajkaronn bore bhaxen choltalem ani lok khuxal ani dhadosponnim jietalo. Punn ek dis tacheach sombondi ani ixtt raian tacho ghat kelo ani tea rajeacher ghuri ghali. Tea raiak ani ranniek tannem marun uddoilem ani kunvorak bondkhonnint ghalo. Dusman rai lokank khub tras ani piddapidd divnk laglo. Lokank te sonsunk zalem nam. Konn tori soddvonndar ievn tankam  hea pasantlean suttoitolo mhunn te otrekun ravtale. Bondkhonnint aslolea kunvorak hachi khobor mell’li. ‘Mhoje porjek hanvch soddvonndar zavn suttka ditolo’, mhunn tannem ievjilem. Eke ratik to bondkhonnintlean pollun aplea rajeachea eka ganvant gelo. Sokallim utt’toch to tea ganvchea lokank ektthaim korun, dusman raiak aplea rajeantlean koxe bhaxen bhair kaddcho, hache vixim apli ievzonn sangunk laglo. Punn lokamni taka vollkhunk nam, karonn hache adim to ken’nach lokam modem misllunk naslo. Lokamni tachea uleak add nodor keli ani konnench taka sangat dilo nam. Kunvor niraxi zalo ani apli ievzonn apnna bhitoruch niallunk laglo. Dusman raiak  tachi khobor melltoch, tannem aple xipai dhaddle ani tea kunvorak jivexim marun uddoilo. Tachea mornna uprantuch lokank tachi vollokh mell’li. 

Jezu Kristachea jivitantui oxem ghoddlem. Apunn Devacho Put mhonntana lokamni taka vollkhun ghevnk nam. Tech bhaxen jen’na tannem apunn Jivitacho Unddo mhunn sanglem, ten’na lokank  hi xikovnn mandun ghevnk khotthin disli. Tachea pattlavdaram modlim zaitim zonnam taka soddun gelim. ‘Ho ek thovoiacho put, oxem kitem uloita’ mhunn tankam distalem. Punn jen’na Jezun apnnan vinchun kaddlolea bara xisank vicharlem, Pedru taka khoreponnim vollkhota ani Jezucho Sasnnik  Jivitacho sondex svikarta. Jezuk mandun ghevop mhonnlear ek nirnnoi – a choice. Tachim utram aikun aplea dispott’ttea jivitant pallo divop. Poilea vachpant legun Joshua Israel porjek hera devam modem Sorvespora Devak vinchun kaddunk tanka ulo marta. Tech bhaxen aichea dusrea vachpant Bhag. Paulu poti-potinnichem udaronn divn Krist ani Povitr Sobhecho sombond amche mukhar dovorta. Ghov bailamni ekamekak visvasponnim ravcheak xiddkaita.

Bhavam bhoinnimno Kristak ami jen’na amcho Dev ani Somi mhunn mantanv ten’na ami tacheo adnea legun amchea jivitant samballunk favo. Ten’nach ami Krista thaim amchem visvaxiponn dakhovnk xoktoleanv ani Pedru bhaxen khorea bhavarthan ani mogan taka vollkunk pavtoleanv. Na zalear fokot jiberuch ‘Jezu mhozo Somi’ mhunn sangun amchea khasgi jivitant boltench kitem korun astoleanv. Jezucho kosloch probhav amchea jivitant amkam discho nam. Tech bhaxen Jezuk mandun ghevnk amkam Devache kurpechi goroz asa. Jezuchem provochon aikun zaitim taka soddun gelim, punn Devache kurpen bhorlolea tachea xisamni taka sanddunk nam. Tannim hi kurpa aplea jivitant ukteponnim apnnailoli. Tor hea misant vantto ghetana ami legun Deva koddlean tich kurpa magum-ia. Tache xokten Devan dil’lea adneak amchea jivitant, utramni ani kornneamni dakhol korun dusreank bori dekh divncheak Devachem dennem ami magum-ia.

-- Cl. Jason Pinto, SDB

SADEA KALLACHO VISAVO AITAR

Pritichea bhava bhoinnino, aichea tinui vachpancho vixoi zavn asa borem jevonn. Poilea vachpant ami aikotanv zannvaien borem jevonn toyar kelam. Ti aplea chakrank, sadea mon’xank hea jevnnant vantto ghevnk apoita. Jen’na ami amchem pixeponn fattim dovrun hea jevnnant vantto ghetanv ten’nach ami borem jivit jeitanv. Dusrea vachpant Bhag. Paulu amkam amchea jivitacher barik nodor marunk sangta. Dil’lea vellacho boro vapor korunk to formaita. Ami Devachi yevzonn amchea jivitant somzun ghevnk zai. To Sorginchea Bapak, Jezu Krista vorvim gaionam ani stotram gavun kallzachea khollaie thavn argam divnk sangtam. Juanvachea Xubhvortomant Jezu amkam sangta ki apunn jivitacho unddo, zo konn ho unddo khata, tankam sasnnachem jivit favo zatolem. Punn Zudevank hi xikvonn manun ghevnk bhov kotthinn laglem. Jezu mhonnta zo konn mhojem mas xevta ani rogot pieta tankam sasnnache jivit favo zatolem. Ho unddo sorgar thavn denvlam. Amchea purvozamni sorgincho unddo khal’lo punn ti sogllim morun gelim. Punn ji konn ho novo unddo khatolim, tim sodam sodankal jeitolim.

Priticheano ho jivitacho unddo novea korant zavn asa amcho Somi Jezu ami hem sorginchem jevonn mhonnje ho Porom’ Sonvskar (Povitr Mis). Ji konn hea misant khuxalkaien ani bhavarthan vantto ghetat tim subhagim. Tankam favo zatolem sasnnachem jivit. Dev amcho udarponnan mog korta. Punn ami zaite pavtti tache sorxintlean pois vetanv. Oxem asatanai to amkam ken’nach soddinam. To itlo mogall ani udar ki tannem aplea ekleach Putak amche khatir pattoilo. Tachi kudd ani rogot zavn asa amkam sasnnachem jivit. Ani tachea ap-somorponnacho ugddas mhonnje Povitr Mis.

Punn priticheano az ami hea misacher  ami koxe bhaxen vantto ghetanv? hacher nodor marum-ia. Jen’na hanv “ami” mhonnta ten’na tantum tumi ani hanvui asam. Mis attank aslear ami sarkem attank na zalear sadde attank bhitor sortanv. Thoddo lok tor kuminianvachea vellar bhitor sortat. Tornattim mobile-cher busy astat. Bailio soglleo sarkeo mukhel boskam ghetat ani amche thodde dadle igorjechea bhitor ani bhair astat. Xermanv mhonnlear amkam soglleank ek interval. Thodde chit divn aikotat, thodde aikuncho proitn kortat , tor urlolim aitaracho menu toyar kortat. Tornattim igorjechea bhair bosun tancho call-centre suru kortat. Ken’na ken’na Padrincho xermanv legun vhoddlo ani somzunk khotthinn asta, ani tantlem bhavartheank kainch kollonam. Misak ami bexttim  ievn bostanv. Gaionam ani zobab divnk amkam chodd koxtt lagtat. Misak vachpam korunk bailo ani cheddvanch fuddem distat. Dadle ani chedde visov ghetat. Hoch amkam misacho valor dista. Aitarachem mis mhonnje amkam  time-pass dista. Vochona zalearui kaim zai na. Thoddim avoi-bapui apunn vochonant ani aplea bhurgeankui dhaddi nant. Thoddo lok vorsamni fokot ek pavtti ugddas ailear kum’sar zatat. Hem amkam somestank lagu zai na, karonn hanga aslolim ami sogllim borim Kristanv zavn asanv.

Pritichea ixttano jen’na ami hea misant vantto ghetanv ten’na ami Jezuchea lagim pavtanv. Punn thodde pavtti amchea pixeponnak lagun ami tachea rogta-masak man divnk pavonanv. Tor hea misa bolidant ami Deva lagim magum-ia ki tannem amkam aplea Putak hea Povitr Sonvkarant vollkhun ghevn pavcheak. 

-Cl. Austin Fernandes  

SADEA KALLACHO EKUNNISAVO AITAR

Marku ek ganvcho bhurgo, aplea xarant ravtole mauxek bhett diunk vetalo. Tacho xarantlo ixtt zavn aslo Mathev zo tachea mauxechea ghora kuxin ravtalo. Mathev zaite pavttim aple xallechi khobor aplea ixttak sangtalo; ki koxe bhaxen tanchem xikovpi bore bhaxen xikoitale ani her bhurgeank tea xallent xikunk avoddtalem. Markuk hi xalla pollunk zai asli. Dekhun ek dis Mathev taka apnna borobor vhorta ani thoim tankam teach xallecho Principal mellta. Punn taka polleun Marku aplea ghora vochunk portota. Hem polleun Mathev tachea pattlean veta ani taka vicharta ki kiteak mhunn to porot vetalo. Punn Markun taka zobab dilo na. Tea Principalan xallek zaitem borem kelam mhunn Mathevan aplea ixttak sanglem. Punn Marku ragar zata ani Mathevak sangta ki taka tachea xallechi ani tachea Principalachi khobor ani ken’nach aikunk naka ani he bhaxen to ghora porot veta. Kitem mhunn zal’lem kai Markuk? Kiteak mhunn to aplea ghora portolo? Te xalecho Principal Markucheach ganvantlo aslo. To zavn aslo Markucho soiro. To ek zaddu-marpachem kam’ korpi gorib familintlo aslolo. Markuchea avoi-bapain taka sanglolem ki to tea familik ken’nach mellchona ani tanche kodde uloiuncho mhunn. Ganvcho lok tea gorib Principalchea familicher add uloitale, vaitt utramni tankam pachartale ani he bhaxen tankam porke lok koxe manun ghetale.

Aichea Xubvortomanant amkam tech lok melltat, je gel’lea aitarachea Xubvortomanant asle punn he lok Jezuk dusre bhaxen polleunk lagle. Tankam dista ki Jezu apnnakuch ek chali bhailo (extraordinary) monis koso pacharta. Judev lok tache vixim gunngunnunk lagta karonn Jezun mhonnlem ki to sorgar thavn denvla. “To apleak konn mhunn somzota?” tannim mhunnlem, “Ami tachem mull zannanv. To zavn asa Juze, eka suttaracho put. Tannem apunn sorgar thavn denvlam oxem koxem mhonnum ieta?”. Jezu portipall korun mhunnta, “Tumche modem gunngunnum nakat.” Hea sobdancho orth mhonnlear dusreanchea pattlean vaitt ulounk. Jezuchea kallache Judev lok tech kortale, je tanchea purvozamnim kel’lem jen’na te oronneant asle. Tea lokamni Devacher ani Moizesacher add uloilolem karonn tankam oronneant cholunk naka zal’lem ani borem jevonn mello naslem. Jezu mhonnta ki tanchea purvozamnim Devan sorgar thavn dil’lem man’na khalem ani tim morun gelim. Punn sorgincho unddo, zo zavn asa Jezuch, amkam sasnnachem jivit ditolo.

Jezu lokank sangta ki to Dev, tachea Bapa thavn hea sonvsarant aila. Hi novi kolpona: Dev Bap ani Dev Put, Judev lokamni poilech pavtt aikololi karon te mantale ki Dev ekuch. Ami amchea chaltea jivitant hem bore bhaxen zannanv ki je lok sodanch dusreank guneanvkari mhonntat vo dusreancher add uloitat te khoinchea-i novea kolponak manunk fattinch astat. Zori tor tannim aikololem aslem tor tankam kolloun ietolem aslem ki jea dixtti poddo naslolea Devak tim vakhanntalim, toch atam Jezu Krist tachea puta vorvim tanche nodre fuddem aslo. Jezu mhunnta: “Hanv sorgar thavn denvlolo Jivo unddo; ho unddo khatat tim sasnnak jivim astolim”. Jezu hanga aplea kuddichea masa vixim uloina, punn aplea sopurnn ostitva vixim takam kollit korta. Jezun aplea kuddi vorvim amkam apli keleant. Misachea bolidanant to fokot unddo ani soro nhoi, tantunt Jezuchi kudd, tachem jivit ani tachem Devponn legun asa. Jezun sanglem ki ami sasnnik jivitak togta toslea khanna khatir tras gheunk zai.

‘Sotmanunk’ mhonnlear nhoi fokot gineana pormonnem kobul korunk, ki Jezu zann asa Dev. Bhagevont Juanvchea Xubvortomanant “Sotmanunk” he utor xembor pavttim chodd ani chodd amkam mellta. “Sotmanunk” zavn asa ek mhotvachem utor. Ami sotmanina zalear amkam Dev Bap, Jezu Krista tachea puta vorvim ken’nach mellchona. Jezu Krist Dev, hea zannvaien xis vaddle karonn tannim sotmanlem. Dor ek milagr, dor ek khunna ji Jezun kel’li: zoxi Panch hozar lokank jevonn dilem, udok soriant bodol’lem ani Jezu doriacher cholta, hea sogllea ghoddnnenamni tachea xisancho bhavarth vaddlo. Dusre vatten ami polletanv ki Judev lokamni zaiteo milagri ani khunna onnbhovloleo punn te Devak Jezu vorvim vollkhunk pavle nant.

Ami sogllim jim hanga hajir asanv amchem kitem? Judev loka bhaxen amkaim milagri ani khunna polleunchi sonvoi zalea. Ami-i Devak volkhunk visorleanv, amchea dispott’ttea jivitache ghoddnne vorvim, jen’na odruxtt vo tallnniencho vell ieta ten’na ami vichartanv ki Dev khoim asa? Tannem oxem kiteak kelem? He khorem ki ami mantanv ki Dev soglle kodde asa ani Jezu Xrist amche firgojent vo kopelamni jieta. Ami taka Krist prosada vorvim Misa bolidanant xevtanv. Punn ami Jezu kodde lagim aileanv kai? Tor ‘Sotmanunk’ aichea kallar mhonnje ami amchem jivit bodlunk, amchem kalliz bodlunk ani he bhaxen Jezu kodde lagim ieunk. Jen’na hem ghoddtolem, ten’na hoch Jezu Krist zo ami Misachea bolidanant svikarla, amchea jivitak orth ditolo. Tor ami magum-ia ki ami Jezu kodde lagim ievn, hea sonvsarant tachea pavlamni cholunk ani he bhaxen sasnnachea-sasnnak ami sodanch Jezu borobor jieunk.

- Cl. Jonathan Ribeiro, sdb

SADEA KALLACHO OTTRAVO AITAR

Khann ani jevonn zaun asa mon’xak chodd mhotvachem ani gorjechem. Hanchea bogor tachean jieunk zaunchem nam. Ek vo don sumanbhor tujean bhukeun ravunk zait, punn xekim tum osokt ani nitrann zatoloi, hantum kainch dubav nam. Aiche vachpamni legun ami khanna jevnna vixim aikotanv. Poilea vachpant ami aikotanv koxe porim Israel porza jevonn nastana bhukeun Sorvespor Devak xirapta. Oronneant ieunchem bodlak tankam gulam’ponnant aslolem chodd borem dista, karonn thoim tankam zai titlem khaunk ani jevunk melltalem. Tanchem hem rudon aikun Moizes Deva kodden tanchi bhuk nivarunk magta. Ani Sorvespor Dev aplea udarponnan tankam sorgim thaun man’na favo korta.

Hem vachop aikun ami chintunk puro ki, suttke uprant Devan tanche khatir jevnnachi vevostha kiteak korunk na gai? Israel porjek legun hench bhoglem zait? Punn ami hi ek mhotvachi gozal ugddas dovrunk favo, ti mhonnlear Devachi ji manddavoll asa ti amchean ken’nach somzunk zaunchi nam. Vankddea vollincher legun Devachean nitt boroum-ieta. Oronneant astana zalerui Devan tanche khatir sorgim thaun jevonn dhaddlem. Tankam man’na favo kelem. Kitlo vorto amcho Dev ani kitlim vorti tachi mhoima!

Amche jinnient jen’na koxtt ietat ten’na ami kitem kortanv? Deva add uloitanv! Devak ami xiraptanv! Tech porim amkam zo konn koxtt dita, tras dita tancher legun ami add uloitanv ani tankam xiraptanv. Hem korchea bodlak amchean Deva lagim tachi kakut ani tacho adar magunk zai na? Dev amcho dhir adar To amkam ken’nach sanddcho nam. Amchea bhitor ho bhorvaso asa kai?

Aichea xubhvortomanant Zudev lok Jezuk ek milagr korun dhakounk magtat. Tankam Jezu fokot ek milagr korpi, ojapam korpi – ek jadukar koso dista. Jezu tanchem modem sorginche raj porgottunk ani Devacho ghutt tanche modem ugddapo korunk ailolo. Punn tanche unnea bhavarthak lagun tannim Jezuk vollkunk nam. Ami amchea jivitacher legun ek nodor marum-ia. Amkam Jezu konn? Fokot ek milagr korpi, ek suttke-zhuzari vo ani konn? Devan hea sonvsaracho itlo mog kelo ki tannem aplea ekach putak, Jezu Kristak hea sonvsarant dhaddlo. Jezun legun amcho itlo mog kelo ki to marekar khursachem moronn legun svikarunk toiar zalo. Dev amche modem ailo, jielo ani melo. Ani itlench nhoi tor tisrea disa mornnantlo jivont zaun, tannem apli podvi ani xokti amkam kollit keli. Misache dor eka bolidant ami Jezuk, hea Sonvsarache tarokak xevtanv. Tor tache kitle gunn ani totv amche bhitor rigleat? Amchem Kristanv jivit ami koxem bhaxen jietanv?

Amche somazant itle piddapidd ani koxtt divpi monis disan dis vaddot asat. Ten’na legun ami tanche jivit –bodlovnne khatir magchem soddun Devacher arop ghaltanv. Kitlexe sondhi amkam melltat, amchea peleachi seva korcheak. Devan aplo mog apnnan rochlolea rochnnechi seva korun dakhoilo ani ami?

Aichea  hea misant vantto ghetana Deva lagim hi kurpa ani dennem ami magum-ia. Kristache pattlavdar koxe tacho mog ani doia ami gorjent asloleam thaim dakhoim-ia.

-          Cl. Kiran Nazareth, SDB

SADEA KALLACHO SOTRAVO AITAR

Pritichea bhavam-bhoinnimno, aichea vachpamni ami ‘Jezu, Jivitacho Unddo’ hachi khobor aikotanv. Mon’xachea jivitant tan ani bhuk heo bhov mhotvacheo gorzo zaun asat. Monis khaina jevina zalear osokt zata ani chodd osokt zalear morunk pasun xokta. Khoreponnim amchean sangunk zata ki, khann ani pivonn amcho jiv samballta, amkam boll ani ghottai dita, amchem poxonn korta. Khai nastana vo jevi nastana konnacheanui ravunk zaina.

Aichea poilea vachpant ami aikolam koxe bhaxen Devache xokten Elisha provadi unddeanchi milagr korta ani thoddexeach unddeamni xemboramni zomlolea lokank dhadoxi undde vanttun dita. Hantuntlean amkam Sorvespor Devachem udarponn ani aplea loka thaim tacho mog disun ieta. Tech bhaxen aichea dusrea vachpant, Efezkarank boroilolea chittint Bhagevont Paulu amkam, Kristacher bhavarth dhortoleank, aple Kristi apovnnek visvaxiponnan jeiunk formaita. Ani hem apovnnem ami sopurnnaien jieunche khatir to amkam khalteponnim, dulobaien ani sonsnikaien ekamekak adar diun, mog korat mhunn sangta. Karonn ami sogllim ekach Kristachi kudd, ekach Atmeachim bhagidaram, eka bhavarthan ani eka Povitr Snana vorvim Deva Bapa thaim jietanv. Dekhun oxem astana ami ekamekacho mog korun dusreanchea huskea-khontimni vantteli zaunk favo. He vorvim ami herank bori dekh ani Kristachi khori govaiki diunk pavtoleanv.

Devan mon’xacho itlo mog kelo ki, toi amche bhaxen monis zalo. Mon’xa soimban to amchem modem jielo, koxtt sonsle, khursar melo ano xekim mornnacher zoit vhorun to Punorjivont zalo. Ho zaun asa amchea bhavarthacho ghutt. Ami ghoddie chintunk puro ki itleanuch sogllem somplem. Jezu atam aplea Bapa sangata asa, hea sonvsarant nam. Punn khorem mhonnlear Jezun ho sonvsar soddche poilem  ‘Povitr Sonskar’achi stapna keli, ji ami misache povitr bolidanant bhettoitanv. ‘Hem mhojea ugddasak korat’ mhunnon Jezun apunn-khud’d Misa bolidanant unddea ani sorea rupant amchea kallzamni ieta. Hem vorvim Jezu amchem Doivik khann zalo. Aiche Xubhvortomanant ami aikolam koxe porim Jezu panch hozar lokank jevonn vaddta. Tea  vorvim aplea sorginchea jevnnachi ghutt legun tannem aplea xisank, ani amkam-i dili. Tea bhurgeachem udar mon polleun Jezu khuxal zata ani aplea Bapak dhin’vasun to aplea xisank te panch undde ani don masllio panch hozar loka modem vanttunk sangta. Xisank ani kherit bhaxen Filipak matui gomona koxem porim hem zaunk xokta. Tori astanam tannim aplea Guruchi adnea pall’li ani lokank zai title undde ani masllio vanttleo. Lokamni  pottbhor dhadoxi zai poriant te khale. He milagre vorvim Jezu ek dis apnnakuch moddun, vanttun ditolo mhunn khunnaita. He ghoddnnem vorvim amkam Devachem-i udarponn disun ieta.

Dev amkam amchea jivitant ami dhadoxi zai meren apli kurpa, kakllut ani doia ot’ta. Tachea udarponnak koslich mit-mer vo ott (kondisanv) na. Amchea dublleponnan ani khalteponnan ami jem kitem Devak ditanv, Dev to anikui chodd ani chodd mapan dusreanche boreponna khartir vaporta. Dekhun aichea hea misa bolidanant vantto ghetana  ami niall korun amkanch vicharum-ia – Devache Doivik Manddavollicher amkam bhorvanso asa? Amchea jivitant Devachem hem udarponn polleun heram khatir, tanche sevek ani adarak ami pavunk toir asanv? Zor na zalear Deva lagim tachea udarponnan hi kurpa ani boll magum-ia. 

- Cl. Jason Pinto, sdb