SADEA KALLACHO VISAVO AITAR

18vea xekddeantlo kovi Robert Frost hannem 1915 vorsa ek kovita boroyli ji ekdom' famad zali. Te kovitechem nanv, 'The Road not taken'. He kovitent to aplem khaxelem chitr vornnita. Ek dis Robert ranantlean vatt choltalo. Oso khub vell chol'lea uprant to don vatto zatat tea zagear pavta. Atam apnnem khoinchi vatt dhorpachi tea vixim to ghuspota. Donui vatto to bariksannen polleta. Ek vatt asli zache velean zaito lok cholun gela mhonn kolltalem kiteak te vatter aslolem tonn maddoylolem aslem. Dusre vatter hirvem tonn aslem ani te vattentlean choddso lok cholun vochona mhonn sangunk kotthin naslem. Robert Frost hi vatt ji dusrim choddxim vapornaslim ti vatt vichun kaddta. Robert Frost he kovitent mhonnta ti vatt cholun apunn khub khuxal ani dhados zalom. Choddxim ami vollkhichi vatt vichun kaddtanv, onvollkhichi vatt dhorunk ami toyar zainanv. Vollkhichi vatt lamb porian aslear ami porva korinanv. Kiteak ami jivitant 'risk' gheunk sodinanv. Nisonnttonak pavoita ti vatt viskoll punn sorgar pavoita ti vatt oxir!

Izaias Provadiachea Vachpant, Sorvespor Dev soglleank Judevank ani onbhavartheank porian Aplea Povitr porvotar zoma kortolo mhonn sangta. Devache soddvonnenk xim'mer na. Ti soglleank ukti. Zaitea karonnak lagun hanga-thoim ximpddon poddlole porjek, Izaias Provadi porzollunk aslolea Jeruzaleachi khobor sangun buzvonnecho son'dex dita. Soglleanchi Dev soddvonn kortai zalear porian To konnank boll (force) korchona. Zonn eklean hi soddvonn zoddunk mhenot gheun vavrunk goroz asa. Konnachean ogi bosun ravun soddvonnechi vatt polleunk zaina. Xubhvortomanant Jezunuch mhollam, 'oxir darvontteantlean bhitor sorunk proyotn korat'. Hebrevank boroylole Chittint, bapuy aplea bhurgeank bore vatter ghalunk xiddkayta tem chitr amchea niyallak dilam. Tech porim Sorvespor Dev Aplea bhurgeank kheast laita, xiddkaita zalear, bhurgeamni borim follam diunchim ho Tacho ud'desh zaun asa. 

Ami Kristanv mhonn amchem taronn apxinch zaunchem na. Amchea taronna pasot amid or eklean mhenot korit ravunk gorjechem, vatt cholot ravop mhotvachem. Amam Kristanvank JIVIT mhollear cholot ravpachi vatt. 'Tujea borabor ami jevleanv...piyeleanv ani amchea rosteancher Tunvem xikovn dilea.' Oxem somzun amchem taronn zatolem mhonn ami somzotanv zalear ami amkanch fottoitanv. Dekhun, ami Kristi apovnnem jiyeunk ekdom' gorjechem. Tea pasot hea sonvsarant jiyetana ami Kristanv dhormanchi dotorn amchea chaltea jivitant vevharik korunk vaurunk zai. Sorginchea Rajeant asloleank polleun ami ghoddie thottak zaunk xoktanv. Thoim ghoddie ami zankam vaitt sobhavachim mhonn lekhtaleanv...zankam ami kikont kortaleanv... adi. torechim mon'xam asunk zatat. sorginchea Rajeache nem' kaide sonvsari rajeachea nem' kaideam poros khub veglle. Sorginchem Raj apnnaunk oxir vattentlean poinn korum-ia.

SADEA KALLACHO EKUNNISAVO AITAR

SADEA KALLACHO EKUNNISAVO AITAR

Xubhvortoman Lk 12: 32 – 48

Aichea xubhvortomanant Jezu amkam eka visvaxi chakrachi vopar sangun visvaxiponnan ami jiyevnk ulo marta. Amchea jivitant visvaxiponn chodd gorjechem. Visvaxiponn ani patienni nastana  hea sonvsarant amchean jiyevnk khub kotthinn zatolem. Amchea chaltea jivitantui ek nodor marlea amkam hem spoxtt disun ietolem. Zonavoram modem sogllea-von visvaxi zonavor mhonnlear sunno. Sunno ken’nai aplea dhoniachem ghor rakcheak chotur. Jen’na dhoni ghora ieta ani taka to sunno zago mellta, ten’na taka khuxi zata. To taka kitem na kitem khavnk dita ani apli khuxi ucharta. Punn zor to sunno nhidlolo taka mellta ten’na dhoniak rag ieta ani taka khontt marun to taka khast dita. Visvaxiponnak amchea jivitant khub mhotv asa. Mon’xachea sombondant legun jen’na sorkari kam’ korpi postman, vo dud haddpi bi aplem kam’ visvaxiponnan kortat, ten’na amkam khuxi bhogta ani ami tankam inam’ ditanv.

Aichea poilea vachpant ami Israelkaranchea visvaxiponna vixim aikotanv. Tea kallar Izraeli lok Babylonachea raia khal aslolo ani tankam zaite koxtt-dogd sonsche poddle. Tori astana to lok Devak visvaxi ravlo. Hacho porinnam’ tankam suttka favo zata ani Devacho sangat tannim onnbhovlo. Aichea dusrea vachpant Devacher bhavarth dovrunk Hebrevank boroilolea chittint amkam vachunk mellta. Bhavartha udexim Abraham’, Izak, Jakob Devak manvole. Hoch bhavarth ami amchea-i jivitant dovrunk favo.

Dev amcho dhoni ani bapui. To amkam chakor koso lekhina. Punn bhurgea bhaxen polleta. Ani jen’na ami amkam dil’lea vavrant visvasponni sufoll zatanv ten’na to amchi patt thapttavn amkam xabaski divn mhonnta. “Xabas, borea ani visvaxi chakra, tuka hachea poros vhodd zobabdari hanv ditolom.” Ami hi sonvsari vatt chotana zaite tallnneo ani nagovnneo amchea jivitant sampoddtat, vo ami tankam sampoddtanv. Hea vellar ami Devak ulo marunk favo. ‘Jezu kitem kortolo aslo?’ mhunn ami amkach vicharunk zai. Jezuchea jivitantui zaite tallnneo aileo, punn Devacher tannem visvas dovrun ani Povitr Atmeachea sfurten tannem tancher zoit vhelem. Ami sodanch chotur ani zagrut asunk zai.

Dekhun aiz hea misa bolidanant vantto ghetana Deva lagim hich kurpa magum-ia ki amkam tannem visvaxi ravchem dennem dincheak. Tachea mogan ani kurpen ami sodanch amchi vatt cholcheak tacho adar ami magum-ia.

--   Joel D’ Souza, SDB   

SADEA KALLACHO SOTRAVO AITAR

SADEA KALLACHO SOTRAVO AITAR

Xubh: Lk 11,1-13 

 Ek Sfurthi: Ek bhurgo 'hostel'-ant xiktalo. Ek dis to aplea bapaik sodanche porim chitt boroyta. Te chittichea xevottak to iskolache piknikechi khobor ghalta ani khorchak don hozar rupoi dhaddun di mhonn sangta. Tacho bapui chitt boroun zap dita ani tantum don hozar rupoyanchi cheque ghalta. Te chittint tannem oxem boroylolem: 'Mogachea Puta, Mhojean tuka ek lak rupoy dhaddunk zatat, punn toxem kelear mhaka tujeo mogan boroylolea chitti yevpacheo bond zatoleo. Tum boroyta teo chitti vachunk hanv vatt polleun ravtam. Tunvem mhaka zaite pavtti boroylolem zai. Tuzo mogall bapui.' Devachem Utor: Utpot'tichea Pustokantlea Vachpantlean Apleak ulo martoleank Dev kednanch poro ghalchona mhonn thavem zata. Tantum Abravanchea magnneancho ul'lekh kela. Sodoma ani Gomorra pasot, Abranv magnnem korta, tanche pasot koslim vannponna korta tem ami zannonv. Gomorra ani Sodomantlea ganchea lokamni vhodd patok kelolem. Devache nodre mukhar tim khala poddlolim. Abramanchea magnneank lagun Dev tancho bhosm korina. Sant Paulu, Dusrea Vachpant, Koloskarank Povitr Snana-chi xikovnn dita. Hi xikovnn mhollear ami sogott zanna amchea Povitr Snana vorvim Jezuchea mornnant ani jivontponnant bhagidaram zaleanv mhonntoch ami patkak meleanv. Hea bhavarthacher tancho khol visvas aslolo tacho Sant Paulu Koloskarank ugddas korta. Xubhvortomanant, apnnank magnnem korunk xikoy mhonn xis Jezuk sangtat. Jezu tanchea magnneank pallo diun tankam 'Amchea Bapa�' hem orthabhorit magnnem xikoyta. Dev amkam aplea bhurgeank sodanch aikota ani amcheo gorzo bagoyta. Amchea Jivitak: Amchea jivitant ami Devak ani Magnneank poilo ani mhotvacho zago diunk ekdom' gorjechem. Povitr Pustokant Jezu Magnneancho monis aslo mhonn thavem zata. Jivitant mhotvache nirnnoy gheunche poilim to magnnem kortalo. Magnneam vorvim Jezu Bapak chikttun ravtalo oxem amchean khatren mhonnonk zata. Magnnem korun amchean Deva lagim ulounk zata. Abranvam porim amcheanui Jezu lagim maglear Dev amcher add nodor korchona. Jezun dusream pasot magnnem kelem te porim ami-i amchech pasot magnnem korpachi tallnni vattaum-ia ani amchea magnneant dusreancho ugddas korum-ia. Ami kortanv tim magnnim sogllea bhavarthan ani ekdom' lhanvikayen korum-ia. Magnnem kortana Devachi vakhann'ni, bhozonn, magnnim korun amchem magnnem orthabhorit korum-ya. 

- Fr. Ave Maria Afonso

SADEA KALLACHO SOLLAVO AITAR

Sadea kallacho sollavo aitar

Xubhvortoman: Lk - 10: 38 - 42

Aichea xubhvortomanant amkam eka ghoracho dixttavo mellta. Hi ghoddnnuk amkam fokot Lukachea xubhvortomanant vachunk mellta. Aichi hi ghoddnuk tumchea monant chitravn polleyat. Jezu ek soiro koso Marta ani Maria hea dogam bhoinninche ghora ieta. Jezu eka bankar boslolo asa. Maria tachea paiam lagin bosun asa zalear, Marta bhitor randpa kuddint Jezu khatir jevnnachi manddavoll korcheant ghuspola. Martan ghoddie chintlem astolem: Ho Jezu itli lamb vatt provas korun aila, to thokla astolo ani taka bhuk laglea astoli. Tichi khont soimbik (natural).

Marta agttea mukhar randpa kuddint jevonn randit asa. Agtteache uben ani gormin ti ghoddie ghamevn asli ani aplem kopol pustali. Martak zaito husko aslo, karonn tika eke suvater gormi zatali ani dusre suvater taka zaite randop korunk aslem. Ani osle poristhitent ti aple bhoinnik - Mariak polleta. Tika bhogta ki Mariak mhaka randpa kuddint ievn adar dinvchem vixim kainch fikir nam! Fokot Jezuxim bosun tem tachea lagim gozali marit asa. Oslea poristhitent ti ievn Jezuk sangta, "Polle saiba, randpachem itlem kam' asa tori, mhojea hea bhoinnik hachi kainch porva na." Ani ten'na Jezu tika sangta, "Marta, Marta kiteak tum itli khont kortai.....Marian boro to vantto vinchla..."

Mogachea bhavam bhoinnimno hea akhkhea ghoddnnukent amkam Maria ek ievkar divpi ani ugtea kallzachi ostori koxi mellta. Jezu tichea hea gunnak vakhannta. Karonn tinnem sogllem soddun aplem dhean-mon Jezucher lailolem ani ti tachi utram chit divn aikotalim. Marta zori Jezuk ievkar dinvk vavurtali, ti visorta ki chodd gorjechem kitem aslem tem. Jezuk aplo vell divop.

Aichea poilea vachpant ami Abrahama vixim aikotanv - koxe bhaxen tannem taka bhett dinvk ailolea tea tegam soiriank ievkar dilo ani tancho samball kelo. Abraham dimbi ghalta ani tea soiriank ravunk sangta. Magir to tankam piyevnk ani paim dhunvk udok dita. Abrahamachi hi kornni ghora ievkar dinvcheant ek mhotvachi khunna zavn asli. Judeva modem paim dhunvk udok dinvchem khup mhotvachem zavn aslem. Karonn tanche soire lamb provas korun, oronneachi vatt cholun, dhullint buddun ietale. Thondd udka vorvim tankam suseg ani xitollkai melltali. Hem zatoch Abrahaman tankam jevonn dilem. Abrahaman tancho itlo boro samball kel'leak tankam khuxi zata ani te Abrahamak axirvad divn mhonntat ki, fuddlea vorsa tachea potinnek ek bhurgo zolmotolo mhunn.

Aichea poilea vachpant ani xubhvortomanant amkam ek gozal xikunk mellta ti hi - dogaimni, Abrahaman toxench Marien Devacho samball korunk zaito husko dakhoilo. Tannim Devachea hajirponnachi beporva keli nam. Devak ievkar divop mhonnlear sodanch ami purnnponni tachea sangatak asop. Amchem her kam' kuxik dovrun Devachem aikop. Hanv Jezuxim astana mhaka konnem-i tachean vegllanvk zaina.

Aichea misant vantto ghetana ami amkach vicharum-ia. Aiz ami Devachem utor aikolem kai? Devan amkam dil'lo aicho sondex kitem? Tor Deva lagim kurpa magum-ia ki tachem utor aikunk amkam sodanch boll dinvcheak. Misant vantto ghetana eka bhagant tori chit divn amchem bhagidarponn dakhoum-ia - zanv tem khals ubranni vellar vo Kristachi kudd sevtana ami 'Amen' mhunntana.

- Cl. Joel D' Souza

SADEA KALLACHO PONDRAVO AITAR

SADEA KALLACHO PONDRAVO AITAR

Xubhvortoman – Luk 10: 25 - 37

Don mogi kazarachea khuxalbhorit disa akhkhe Povitr Sobhe mukhar mogachi bhas uchartat: "Sukhant toxench dukhant, piddent toxench bholaikent hanv tuka sodanch visvaxi ravtolom/ ravtolim". Kazari jivitachi donuch vorsam somploli. Rosy ani Anton padrvigara lagim logn moddcheak (divorce) ailim. “Fadar, hanvem sukhant toxench dukhant, piddent toxench bholaikent tika samballtolom,  mhunn bhas dil'li ani tika mhoji potinn svikarli. Aiz mhaka koll'lem hi kosli ostori ti!” Antonan padrvigarak sanglem. Rosy ogem ravlem nam, tannem-i sanglem: “Hache lagim kazar zatana hanvem chintlolem ho girest ani boro monis mhunn, punn aiz koll'lem koslo bhikari mhunn to. Oslea mon'xa lagim hanvem koso sonvsar korcho”. Priticheano oslea barik barik gozalink lagun aichi kitlim-xi ghorannim moddleant. Mogak tanchea jivitant kosloch stan-man nam. Tanchem kuttumb renver bandlolea ghora bhaxen! Mog ek mhotvachem totv jem amkam her monzatim thavn vegllaita. Mog mon’xa jivitacho xevott zache vorvim taka jiyevnk orth mellta. Tachem jivit orthabhorit zata.

Aichea vachpamni ani nodor marlear amkam oxench disun ieta. Dev mog ani amkam tachea mogache vangddi zanvk apoita. Tacho mog korunk to Izraelkarank dha updes dita. He updes pallun Dev tachem bhitor biradd kortolo mhunn te chint'tale. Dusrea vachpant Jezu Krista vorvim Devacho mog amkam disun ieta. Kiteak Jezu zanv asa Devacho rupkar. Jezu vorvim Devan sogllea sonvsarachi rochna keli. Ani aichea Xubhvortomanat ami borea Samariakarachi vopar aikotanv. Hea vopari vorvim Jezu xastrian vicharlolea prosnak zap dita. Poilo voilo updes mhonnlear, Devacho mog korop ani dusro aplea peleacho mog korop. Jezu amkam, ami peleachi seva korunk zai mhunn spoxttponni sangta. Ek boro nitivont pelo, mogacho monis zavn asta. To Devachoi mog korta. Moga vinnem kainch zanvk xokona. Moga thavn apxich sevechi bhavna  ubzota.

Zaite pavtti amchea jivitantui oxench ghoddta. Amcho pelo konn mhunn ami chint'tanv? Amchea adarachi zaka goroz asa, to gorjevont monis amcho pelo, zachi mozot korunk ami favo. Samariakar mon'xacho dhaklo divn Jezu apnna vixim uloita. Samariakarank Zudev pontache unne ani khal mhunn lektale. Punn Jezun tancho ho vegllochar svikarunk nam. Jezun legun aplem doivikponn soddun monis zalo ani amchea modem jiyelo. Kitea khatir?  Moga khatir.

Povitr Sonskar zavn asa Jezun Dev Bapachea utrak khal zavn purnn kel'li ek khunna. Hanga Jezun aplea kornnen dakhoilolo mog ami aikotanv, polloitanv ani chaktanv. Tor ami hantum vantto ghetana Jezu amkam 'voch ani tum-i toxench kor' mhunn ulo marta. Hench amchea jivitant ami pallunk Devachi kurpa magum-ia.

-Cl. Austin Fernandes, SDB

SADEA KALLACHO CHOVDAVO AITAR

SADEA KALLACHO CHOVDAVO AITAR

Xubhvortoman – Lk 10: 1 – 12, 17 – 20

Aichea xubhvortomanat Jezu aplea xisam fuddlean tanche karya vo tanche misanv tankam kollit korta. To tankam dogam-dogank ganvamni dhaddta ani Devachem Raj sthapunk ani lokank bori khobor porgottunk adnea dita. Tanche fuddem hem vhoddlem karya aslem.  Dekhunuch Jezu mhonnta, “Pik khup, punn vavraddi thodde”. Devachem vavraddi vaddunk zai, ani taka lagun ami Deva lagim magunk zai. Dev aplea mogan vavraddi utpon korta. Eka apovnnek fokot Dev nirmann korunk xokta. Devache vavraddi, tache pattlavdarache karya mhonnlear, Devachem Raj sthapunk. Hea karyeak xarti pavunk tanka zaite vostuche teag korpak poddtolem. Dekhunuch Jezu tankam hea karyeak sogllem dhean mon lavunk thoddeo suchovnneo ani margdorxon dita.  Tem landdgeam modem menddre koxe zaunk zai. Tanchea jivitant zaite odruxtt ani koxtt ietole toxench tanchea jivitant zaite landdge bhaxen monis ietolem ani tanchea borea vavrak addkoll haddunk vavurtole. Hea poristhitint te chotur ani menddre bhaxen lhanvik zaun zai. 

Dusrem mhonnlear, tanche karyeachi vhoddponna lagun tim jim vostum Sorginchea Rajeachi add vetam tim sogllim nakarunk zai.  Toxech Jevnna vixim jem kaide asat tem Devachea Rajeak lagunk patt korunk zai. Raj sthapunk amcho poilo ani utom hetu zaunk zai, ani magir sogllem dusrem ietolem. Mhonnje amcho visvas mon’xancher vo vostuncher asunk favona bogor Devacher asunk zai. Jezu tankam sogllem soddunk formaita ani tankam goroz tem tankam melltolem. Devachem Raj sthapunk mhonnlear kitem? Devachem Raj zaun asa mogachem, xantichem, moipasachem ani somjikaiechem. Devachea Rajeant mog vosta. Tea Rajeant, monis Devachea nema pormannem cholta ani monis ‘sogllea aplea monan ani kallzan Devacho ani pelleacho mog korta.’ Tea Rajeant nit asa ani sogllea mon’xak man ani respet mellta. Dekhunuch tem Raj ghoddun haddunk ami poilem suvater prachit ani amchea kallzachi novsornni korunk zai. Devachea Rajeachi amkam hea sonvsari jivitant thoddem onnbhovunk zata. Otmea vorvim ami Devachem Raj onnbhovtanv. Devachea Rajeak zo monis vengoita, tea mon’xak Devachi xanti favo zatoli. Xanti zaun asa ek khoro foll hea Rajeachi. Dusri follam zaun asat sasnnik jivit ani sasnnik sukh. Povitr Sobha tem Raj sthapunk dis rat vavurta.

  

Hea vellar ami vollkun gheunk zai ki ami somest zaun asanv eka bhaxen Devache vavraddi, ani amchi zobabdari zaun asa hea Devachea Rajeachi sthapna. Toxench zaite Devache monis ani vavraddi amchea jivitant ietat ani amkam borem margar cholunk margdorxon ani suchovnneo ditat. Punn kitle pavtti ami tancho tallo aikotanv? Kitle pavtti ami tanka kan ditanv? Zaite pavtti ami amche disa-dispott’ttea jivitant gul’l zaun asanv. Ani amchi poristhiti Sodoma poros odik noxtti zatoli kai?

Te dhaddlole beastor zonn sontosbhorit zaun porot aile. Tanchim nanvam sorgar boroil’lim astolim mhunn Jezu khatri dita,  ten’na tanchi khuxalkai purnn zata. Tea 72 xisam porim amchem apovnnem kalljidarponnan ani khuxen ami svikarunk goroz asa. Amchea vavrant Jezuchem boll ani atmo amkam melltolo. Heach khatir aichea hea misa bolidanat ami kherit bhaxen magum-ia.

- Cl. Renvick Pereira

SADEA KALLACHO TERAVO AITAR

Xubhvortoman - Luk 9: 51 - 62

Krista thaim mhojea bhavam bhoinnimno, aichi tinui vachpam amkam Jezucho pattlav korunk kitem gorjeche hache vixim kollit kortat. Poilea vachpant ami Elishachem apovnnea vixim aikotanv. Elisha aplem sogllem soddun Eliahcho pattlav korta ani tachi seva korunk lagta. Hem zavn asa khalteponnachem totv, jem ami amchea jivitant legun apnnavnk zai. Sabar pavtti amkam Jezucho pattlav korunk koxtt zatat. Punn zor amcho bhavarth Devacher asa ani ami pattlav korchea Jezucher thir aslear, Jezucho pattlav korun amkam sompem zata. Magir koslei koxtt, dodg, piddapidd ienv amchean tancho fuddo korunk zata. Aichea dusrea vachpant Bh. Paulu amkam Povitr Atmean dil'lea apovnneak ami pallo divnk zai mhunn amkam kollit korta. Povitr Atmeachea bollan ami ekamekacho mog korun, ekamekak adar divn maiemogan ravunk xoktat. Bhagevontponnachem jivit jiyevnk amkam jem apovnnek mell'lam taka ami ken'nach add nodor korunk favo nam.

Dev amkam zaite sondi dita, apnnacho pattlav korcheak. Punn zor ek pavtti ami ek sond vhogddaili, tor amkam dusri sond mellunk khub oxoktaiechem. Ek pavtti kel'li chuk vo patok ami nivarunk polleunk zai, na zalear teach fonddant ami urtanv. Jezu zaitea zannank aplo pattlav korunk apoita. Punn tim ek na ek nib divn Jezuchem apovnnem nakartat. Poilo apleak bapaik matiek lavcheak magta. Dusro aplea ghorcheank adevs magcheak vinonti korta. Hea vorvim Jezun dil'li sondi tannim vhogddaili. Vhogddailoli hi sondi tankam portun mell’lim nam.

Jezun aplea Bapachi khuxi sodanch xarti pavoili ani sodanch aplea jivitant pall'li. Tannem ti sopurnnaiek pavoli. Jezun mhonnlam: Nangor hatant ghevn pattim polloita to mhozo xis zanvk favo nhoi. Jezun khud'd aplea jivitant aplea sorginchea Bapachi khuxi pallun amkam ek vortem udarhonn dilam. Poile suvater tannem aplo sorgincho voibhov sanddlo ani hea sonvsarant ailo. Dusre suvater hea sonvsarant aplea ghorcheank soddun sorginchem raj porgottchea aplea vavrant tannem aplem sonvsari jivit somorpilem. Dekun ami tachi dekh ghevnk zai.

Aplea utram vorvim, vegllea vegllea poristhitent ani sondorbamni Jezu amkam aplo pattlav korunk  apoita. Tor tachea hea apovnneak ami pallo dium-ia. Misache hea bolidant ami Deva hich kurpa magum-ia ki ami tachea apovnneak pallo divn tacho khoro pattlav korcheak.

- Cl. Patrick Dias

SADO KALL  BARAVO AITAR

Ek xikop naslolo dadlo, firgojechea Vigara sorxim yeun apnnak Batizm gheunk khuxi asa mhonn sangta. Vigar taka khub proxn vicharta ani tachi topasnni korta. 'Jezu khoinchea ganvant zolmolo? Taka kitle xis asle? To khoim melo?' Vigarachea ekui proxnank tachean zobab diunk ghoddlemna. Tednam Vigar taka vicharta, 'tum Amchea Bapa ani Sotmandtam tori mhunnunk zannai? To nhoikar diun apli tokli haloita. Bejar zaun Vigar taka mhonnta, 'tum kitem mhonn zannoi?' Tednam tea dadlean mhonnlem, 'Jezuk mellche poilim hanv bebdo aslom bailek ani bhurgeank khontamni ani danddeamni martalom; mhaka nokre velo kaddlo ani hanv mhojem jivit ibadd kortalom. Punn Jezuk onnbhovlea uprant, hanvem soro soddlo, hanv koxtti vavr korunk laglom, mhoje bailecho ani bhurgeancho hanv mog korunk laglom. JEZU MHOZO SODDVONNDAR!' 'Tor tumi mhaka konn so dhortat?' ho proxn Jezu amkam protekak vicharta. Jezuk tea kallar Juanv Batist, Elija vo Provadi mhonn lok vollkotalo. Pedrun Jezuk 'Devacho Krist' mhonnlem. Hem Jezuk khub avoddlem. Pedrun Jezuk khoreponnim onnbhovlolo to Jezu bori bhonvlolo, tannem Jezucho vavr ani Devaxim asloli Jezuchi bhokti pollel'li. Devacho Krist zavop mhonnlear zaitem soschem poddtolem, bhairavop astolem, jivexim marop zatolem punn To tisrea disa Punorjivont zaun zoitivont zatolo. Hench Jezu aplea xisanchea monant ghalta tem Xubhvortomanant ami vachlam. Poilea Vachpant Mesiasak vo Devachea Kristak lok mandun gheuncho na punn Taka jivexim martole mhonn Provadi bhakit kortat. 'Aspas vidhloleak tim polletolim'. Zobab-Stotrant Devak tanelolea mon'xachim bhavnnam ugddapim zatat. Dusrea Vachpant, Sant Paulu Galasiekarank mhonnta, 'zannaim Povitr Snan ghetlam tim Jezu bori ek zaleant ani tanche modem koslench veglleponn asunk zaina.  Krist makhlolo tech porim ami Tachea pattlavdaramni Krista sovem amkam makhleant mhonntoch amchea Kristi apovnneank sobta toslem jivit jiyeunk vavrunk gorjechem. Jezuchim pattlavdaram zaunk ami amkanch patt korun, amcho dispott'tto khuris gheun Jezucho pattlav korunk proyotn korunk zai. Oxem korunk sompem zaunchem na, khorem mhonnlear tem ek vhodd avhan. Kristachea pattlavdarank, mon'xam modem veglleponn korop sobona. Xisank Jezuchi khori vollokh melltoch tannim oddchonneank ani koxttank legun fuddo korun Tacho pattlav kelo. Ami toxench korunk vavrunk zai. Tech porim ami amche bhonvtonnim asloleanchi vollokh ghetloli zalear amchean borabor vavrun khub borem korunk zatolem aslem. Jezu amcho soglleancho Soddvonndar. Hem sot amchea monant khol rigoun niz Kristi jivit jiyeunk vavrum-ia.

SADEA KALLACHO IKRAVO AITAR

Xubhvortoman - Lk 7: 36 - 8: 3

Novea Korarant aschea xubhvortomankaram modem Bh. Luk amkam ostoream vixim zaitea vortea mapan sangta. Zoxem ami aichea xubhvortomanachea nimannea vollint aikotanv: Jezuchem paim pusloli ti patkinn Jezucho pattlav korunk pavta ani aplem jivit bodolta. Aichi hi ghoddnnuk Simanv nanvachea eka Farizevachea ghora ghoddta. Hea Farizevan Jezuk aplea ghora apovnnem dil'lem ani tachem amontronn svikar korun Jezu tachea borabor jevnnak ailolo. To jevonn korit astana ek patki bail tea Farizevachea ghora ieta ani Jezuk pollevn dukam golloita. Uprant ti Jezu sorxim ievn tachea dukamni tache paim bhizoita ani aplea kensamni te pusta. He zatoch tinnem tache paim eka amolik telan makhle. Hem pollevn lokank ojap dislem, karonn sogllo lok te bailek ek patkinn mhunn vollkotolo. Tea Farizevak legun to prosn topunk lagta, to chint'ta zor Jezu ek bhagevont monis aslolo zalear, hi ostori kosli patkinn mhunn taka gomun ieta aslem. Toxench loka modem ek somzonni asli ki, Jezu vaitt sobhvache ani patki lokancho sangat ditalo.

Zor ami hem prosn matxem bodol korun vichalear ghoddie he porim zait: Devan eka patkeak koxem lagim korum-ieta?

Farizevachea monant aschea hea prosnak protipall korun Jezu eke kannie vorvim tachi zap vicharta. Eka savkarak dog rinnkari aslole ani tankam zor to tanchem rinn maf korit zalear, dogantlea konnak tacho odik upkar astolo? Khoreanich taka odik bhogxilolo rinnkari! Aichem xubhvortoman amkam Devachea bhogsonnem vixim xikoita. Jezu zanna aslo ki ti ostori ek patkinn zavn asli tori to taka bhogxita. Jezun tacher kheast ucharunk nam. Jezuchem hajirponnuch tea bailek bhuzvonn zavn aslem. Jezun taka tichea patkam khatir nit korunk na, punn taka tichi patkam bhogxilim. Tichim odik patkam bhogsol'leam vorvim ti Jezuchoi odik mog korunk pavli.

Xubhvortomanantli hi bail amkam ek udaronn zavn asa ki, ami Devacho kitlo mog korunk zai. Amcho Dev bhogsonneacho Dev, zo amkam sodanch bhogsunk ani apnnavnk toyar asa. Ani tachem hem bhogsonnem onnbhovun ami Devacho chodd ani chodd mog korunk favo.

Amchea jivitacher ek nodor marlear amkam disun ietolem ki, kitle pavttim ami Devachea add vochun chuki keleat ani tech porim amchea pelea add legun ami patok adarlam. Tori astana Dev aplo hat vistarun amkam aple vengent ghenvk ubo ravta. Ami fokot tachem lagim vochunk zai.

Aichea poilea vachpant amkam hachem ek udaronn mellta. David-raian zori chuk keli Devan taka bhogxilem ani aple porjek fuddari zanvk rai mhunn makhlo. Ami Devachem bhogsonnem ek funkott dennem mhunn add nodor korun, anik patkam korunk zainant. Zor ami Devacho khoreaninch mog kortanv zalear ami patkache sondi sanddun tacho mog korunk pavtoleanv. Aichea hea misa bolidanat Deva lagim hich kurpa ani ghottai magum-ia.

- Joel D' Souza, SDB

PRACHIT KALLACHO CHOVTHO AITAR

XUBHVORTOMAN – LK 15: 1-3, 11 – 32

Prachit kallant Povitr Sobha amkam Deva lagim ievnk ek vorti sondhi dita. Kumsarachea sakramenta vorvim ami amchea patkanchim dukh dhorun Deva thaim lagim ievnk pavtanv. Patkanchim dukh dhorop sompem nhoi, karonn amchim patkam vollkun ghevop sompem nhoi. Tori astana Dev Bap uktea hatamni amkam aple vengent ghevnk sodanch otrekan ravla.

Amerikacho Abraham Lincoln jen’na eka zhuz manddpi lokam modem, je Amerikachea ekvottant addkholl ghalunk sodtale,  apli bhett divnk gel’lea vellar eka mon’xan taka vicharlem, “Tum tanche kodden koxem porim vagtoloi?” Tannem zap divn mhonnlem, “Hanv tanchem lagim oxem porim vagtolom, zoxim tim ken’nach vegllim zal’li nant.” Amcho Sorgincho Dev Bap legun hech porim lekhta – zoxem ami Tache koddlean ken’nach vegllim zanvk naslim.”  

Aichea xubhvortomanant ami ‘vechik putachi vopar’ aikotanv. Khorem mhonnlear ‘vechik puta’ bodla hi vopar ‘doiall-movall bapaichi vopar’ zanvk favo. Hea vopari vorvim Jezu amkam Devachea mit-mer naslolea mogachi vollok dita. Heach mogak lagun, kitench pattim dovri nastana To amkam bhogxita. Mon’xa jivitant tallnio ietatuch punn ami tancher zoitivont zanvche suvater, patok adarun tallniank amcher zoit vhorunk ditanv. Patok mhonnlear Devache vatte thavn pois vochop.

Aichea voparintlea tea dhakttea putan legun oxench korunk ievjilem. Aplea Bapaicho mog sanddun to poixilea eka nogrant vochun dusre torecho mog sodunk chint’talo. Aplea bapain dil’le poixe vibaddun eka dukranchea gotteant to kam’ korunk pavlo. Jen’na ami Devache utor sanddun amchich khuxi korunk sodtanv ten’na amchi got legun oxi zata. Tori astana je porim tea bapain aplea putak bhogxilo, tech porim amchea patkanchim ami dukh dhorlear, Deva amchea Sorginchea Bapachem bhogsonnem amkam favo zata. Dev kitench lekhi nastana, kitench pattim dovri nastana amkam puraien bhogxita.

Tor kitea khatir ami uxir korun asanv. Konna khatir ami ravleanv? Cholat tor vegim ami Devachem vengent dhanv marum-ia. Karonn ami ek panvl marlear to amche thaim dha pavlam marta. Ami bhogsonnem magunk vechea adinch to amkam bhogxita. To amche pasot ravla amkam aplea vengent ghenvk ani amkam ek borem jevonn vaddunk aturaien ravla. Tor prachit kallachea chovthea satolleant ami proves kortana amchim patkam vollkunk Devacho adar magum-ia. Tachem bhogsonnem chakun polleum-ia. Dev kitlo movall ani doiall hacho onnbhov ami gheum-ia. Hea kallant ami “Deva doiall, kakutichea, bhogos Bapa sasnnachea” hem git mhonntanv. Hea gitachim utram ani amchea jivitant onnbhovunk Devacho adar magum-ia.

- Jason Pinto, SDB

PRACHIT KALLACHO POILO AITAR

Xubhvortoman – Luk 4: 1 – 3

Alisha ek lhan cheddum aslem. Lhanponnar thavn taka aplo angtto chinvchi padd sonvoi asli. Tachea avoi bapain zaite upai kele, tachi hi sonvoi soddonvcheak. Punn kainch zalem nam. Tannim tachea angtteak tik mirgange pitto legun ghalo. Tori punn kaim forok poddlo nam. Alishachi hi sonvoi soddunk tachea avoi bapaik kiteak zalem nam? Karonn hea vaitt sonvoie bodlak tannim taka dusrem novem kainch dinvk nam. Dekhunuch amchean mhonnunk zata ki, ek pornni sonvoi soddunk ek novi sonvoi apnnanvchi poddta. Devak legun khobor asli ki novi porza ghoddonvk, novi odd, nove chali-riti xikonvk, Israel porzekui adleo chali-riti soddcheo poddtoleo. Haka lagun to Israelkarank challis vorsam oronneant akarnni (formation) khatir dhaddta. Devan tankam Egypta thavn Israelak mottve-vatten vhorum ieta asle. Tori tannem toxem kelem nam. Aple nove bhuint, apli novi porza sthapunk lamb-vatten vechi chodd goroz taka disli. Tanchi gulamponnachi sonvoi sanddun tannim meklleponnachem jivit jiyevnk Devachi khuxi asli.

Gobrachea Budhvara disa ami Prachit kallant proves kelo. Zaite ami mas soddop, sigrett soddop, soro soddop, adi. Osle toreche nichev ghetoleanv. Kiteak lagun? Amchea jivitant noveponn vo novsornni haddcheak! Punn thodde pavtti kaim zonn challis disancho ho prachit soddun anikui dupott mapan portun vaitt sonvoio vengunk pavtat.

Tallnnio amchea jivitant asatuch. Jezuchea jivitantui asleo. Punn Jezun tancho koxem porim fuddo kelo? Jen’na Devchar Jezuk naddun mhonnta: Tum Devacho Put zalear, hea fatrak undo kor.” Taka Jezu portipall korun mhonnta: “Monis fokot unddeanuch jiyena.” Jen’na to taka eka unch zagear vhorun mhonnta: “Hea soglleancher podvi ani tanchi  mhoima hanv tuka ditolom.” Jezu taka zap divn mhonnta: “Sorvespora Devak ekleakuch bhozunk zai.” Ani xekim jen’na Devchar taka mhonnta: “Tum Devacho put zalear, sokla uddki mar.” Jezu taka mhonnta: “Devak ami porikxent ghalunk favo nam.” Aplea porikexnt Jezu pas zalo. Aplea Bapacho adar taka aslo. Tannem sodanch aplea Bapachi khuxi aplea jivitant keli. Ani haka lagun Devan taka ti mhoima ani podvi favo keli, ji Devachi adnea samballtoleank favo. Khoreanich Jezu amchea mukhar ek nomuno koso, zachi ami dekh ghenvk favo.

Tor mogacheamno Prachit kalant ami bhitor sortana Jezuchi ami dekh gheum-ia. Tachea koxtta-dukhamni vantto ghetana, tache porim Devachi khuxi amchea jivitant sodanch korcheak tacho adar magum-ia.

-          Kiran Nazareth, SDB

     

SADEA KALLACHO PANCHVO AITAR

XUBHVORTOMAN Lk 5: 1 – 11

Ek vhodd lokancho zomo eka vhoddlea karkhaneant bhovunk gel’lo. Zaito vogot bhonvlea uprant to lok jea zagear nanni (coins) kortale tea bhagant pavle. Sogllo lok bhitor sorlo ani vitollololea dhatuchea vhoddlea ruma lagim ube ravle. Tea vibhagachea saiban lokank yevkar dilo ani mhonnlem, “Zo konn aplo hat udkant ghalit ani uprant tanche hatar, he khotkhotit udok ghalear, tanchea hatant kainch zanvchem nam.” Zaitea lokamni tachea hea bhasavnnecher visvas dovorlo. Punn jen’na tannem tanchea modlea konnak eklea fuddem yenvk apoilem, ten’na konnui ailo nam. Lokank kollit aslem ki hea kamant zaito tras sonso poddtolo mhunn. Punn teach velar ovchituch ek tornatto fuddem sorlo ani aplo hat tannem udkache baldent ghalo. Uprant tea saiban tachea hatar tem khotkhotem udok ghalem. Magir tea saiban lokank mhonnlem, “Zaiteamni mhojem utor aikolem punn fokot heach cheddean mhojer visvas dovorlo”. Lokamni tea tornatteak vicharlo, “Tuka oxem korunk bhirant disli nam?” Tea tornattean zap divn mhonnlem, “Tumkam ho monis fokot ek sorkari odhikari, punn mhaka, to ek bapui....to mhozo mogall pai ani mhojea paicher mhaka purai visvas asa, karonn to mhozo mog korta.”

Bhavarth vo visvas khub molacho. Bhagevont Pedru, Jezuchea bara apostolam  modlo ek bhavarthi monis aslo. Tachea jivitantleo don ghoddnnio ami polletanv. Ek jen’na Jezu Pedruk udkacher cholunk formaita ten’na Pedru dubavta ani buddunk lagta. Punn magir Jezu taka hat dita ani taka nivarta. Dusre suvater jen’na nimannea jevnnak tim toyari kortastana Jezu Simamv Pedruk tea kuddachem duddu farik korunk sangta. To taka doriant vochun gori ghalunk sangta ani tannem dhorlolea poile maslleche tonddant taka nanno melltolo mhunn sangata. Pedru Jezuchi adnea pallta ani potti farik korta.

Aichea xubhvortomanant ami aikotanv koxe bhaxen Jezuchim utram aikun Pedru aplim zallam khol udkant ghalta ani zaitim nustim dhorunk pavta. Hem zal’lea uprant Pedru roddunk lagta. To Jezuk vollkunk pavta. Apunn ek patki mhunn taka bhogta. He ghoddnne uprant Pedru ani tachea sangatiamni tacher visvas dovorlo ani tannim Jezucho pattlav kelo. Te Jezuche poile-voile xis zale.  

Gaionancho jhelo hea pustokantlean ami hem ek git mhonntanv, “Tujea hatant mhozo hat, Jezu hanv ghaltam.” Hea gitantlean ami legun Jezu thaim amcho bhavarth dakhoitanv. Pritichamno ani lhan bhurgim, tornattim, kam korpi, zanntti-nenntti ap-aplem kam’ kortanv ami ho amcho veg-vegllo vavr suru kortanv. Ami fokot amcheach bollacher visvas dovortanv. Amkam amchech xoktecher bhorvoso asa. Tor aiz thavn ami Devacher ani tacher Otmeacher bhavarth dovrunk xikum-ia ani amchem kam korum-ia. He porim Jezucherui amcho bhavarth khol zaum-di mhunn aichea hea misa bolidant ami magum-ia. Bhavarthachea hea vorsa Deva lagim amcho bhavarth vaddoi mhunn ami magum-ia.

-          Austin Fernandes, SDB    

SADEA  KALLACHO CHOVTHO AITAR

Xubhvortoman : Lk 4: 21 – 30

Mogachea bhavam bhoinnimno aichea tinui vachpamni amkam Kristi bhavarthachea eka mhotvachea totva vixim xikvonn mellta. Ani hem totv zavn asa – Mog. Aichea dusrea vachpant Korinthkarank boroilole poile chittint Bhagevont Paulu amkam moga vixim khollayen sangta. Aplea sonvsari jinnent, Jezu Kristacho ekuch ek sondex zavn aslo – mog. Ani heach moga khatir to khursar morunk pasun toyar zalo. Heach mogant jiyeunk Dev amkam apoita. Ani amchea modlea thoddeank to vinchun kaddta. Aichea poilea vachpant Dev koxe porim Jeremias provadiak vinchun lokam hujir dhaddta hache vixim ami aikolem. Dev dhaddtana ami taka chittkun ravuk favo. Koslei koxtt vo orixttant ami sampddun poddum, to amkam ken’nach sanddina. Tacho sangat amche thaim sodanch asa. Zori lok amkam apnnai na zait, punn Devan amkam aploch kela. Ani hench apleponn monant dovrun ami amchea jivitacho provas, bhiye nastana korunk favo.  

Aichea xubhvortomanant Jezu aplea maim-ganvant yevn aplea jivitacho hetu lokam hujir uktaita. Ani hea hetunt goribank bori khobor, gulamank suttka, kudd’ddeank dixtt ani trasant sampoddloleank suttka dinvk apunn ailam mhunn sangta. Poilo lok tachi utram aikun ojap zatat, punn magir tankam Jezuchim utram aikun ghenvk zodd-avghodd lagtat. Dekhun tim taka marunk sodtat. Tori astana Jezu apnnak Dev Bapan dil’lea misanvak patt korina. Taka nakarlo zori to fattim sorunk nam. Amchea desant ami Mahama Gandhi vixim vachtanv. Sot ani ohimsa khatir to khub vavurlo. Tachem jivituch zavn aslem tacho sondex. Brittix toxench Bharotiy lokamni taka virod kelo, tori to pattim sorunk nam. Xekim taka jivexim marlo. Apnnan khorem manlolea totvam khatir to martir pasun zanvk toyar zalo.

Amchea jivitant legun ami osle poristhitint poddunk puro. Amchea dhorma khatir lok amkam tiroskar vo okmanan pollounk puro. Tori ami niraxi zanvk favo na. Jezu bhaxen ami legun ugddas dovrunk favo ki Devan amkam vinchlam. To amkam ken’nach sanddcho na. Aichea hea misa bolidant ami vantto ghetana Deva lagim hich kurpa magum-ia ki tachea mogant ami jiyevn, tannem amche khatir yevjillem misanv ami sopurnnaiek pavoncheak.

-      जेसन पिंटो , SDB 

  

SADEA KALLACHO DUSRO AITAR: CYCLE C

Bhavam-bhoinnimno, Jezu Natalachea disa amche modem ailo ani toch Jezu amche modem ievn amchea dis-pottea jivitant misoll zalo. Aichea poilea vachpant ani xubhvortomanant, kazari jivitacher nodor ghalta. Kazaracho vell zaun asa ek sontosacho, khuxeicho ani utsovacho vhell. Kazara vellar lok mhurgottat. Novro aplea vhoklak polleun voir murgott’tta ani vhokoll aplea novreak pollevn murgott’tta. Poilea vachpant, Dev Siona vixim aplo mog dakhoita. Devachea bollan; Devachea mozotin Sion porzollit zata. Dev Siona lagin logn zata ani Devachea sontosan Sion sontos zata. Heach kazari jivitant, Dev sodanch vixvaxi ravta. Punn zaite pavtti ami Povitr sobheche bhurge je zavn asat Novi Sion, zaite pavtti ami ovixvaxi urtanv. Ami Devachea mogak zobab divnk zai. Devacho mog ami nhoi fokot onnbhovunk zai bogor to mog ami ximpddavnk zai. Dusrea vachpant, Bhagevont Paulu amkam amchea dennea vorvim, ami Devachea mogachi govaiki zavnk zai mhunn formaita. Dev amkam zaitim ani veg-vegllim otmik denneim dita. Ti soglim dennim nhoi amchea svotachea faideak, punn Povitr Sobhechea faideak ani boreponna khatir. Dekhunuch ami sogllim khaltikaien amchea gunnanchi vapor korunk zai. Jenn’a ami amche gunnanchi vapor amchea svotachea faideak kortanv, tenna ami Devak, zannem amkam rochlam ani he gunn dileat, tachi beporva ami kortanv. Zonnekleak aplea Devan dil’ea gunnacho vapor Povitr Sobhechea udorgoti khatir korunk zai.

Aichea xubhvortomanant, Jezu apli poili khunna(milagr) korat. Hea khunnea vorvim, Jezu adlea korarachi bhasavnnek purim korta. Toxench Jezu hea kazarant vantto ghevn, to tea kazarachea lokanchea akantant pavta. Hi milagr Jezuchea avoichea vinnovnen zata. Jezuchi avoi zavn asli, ani azunui zavn asa tachea karyachi bhagidar. Jezu hea kazarant vantto gheta, tacho bhett zaun asli tachem jivit. Oxim ek kanni asa, ek astik monis eka kheddea ganvant vochun, zaite bhett vanttpak lagta zoxe kopde, jevonn adi. Tea ganvant, padri kenna ietalo. Tea astik mon’xan ganvchea eka zanteak vincharta, ‘Tujea padrin tuka kaim haddunk na kiteak?’ Ten’na tea zanttean mhonnlem “Tunvem mhozo otmo pollunk ieta kai?” Tea astik monxan mhonnlem: ‘Na”. Tea zanttean zobab dilo “Zori tuka disun iet-aslem zalear, tuven ek dhovo angovstr polleun zatolem aslem, mhojea otmea vhoir tea padrin ek dhovo angostr ghaila, ani zoxe to ieta, to mhaka Povitr Sonvskara vorvim mhojea kallzan to Jezu ghalta”. Tuzo bhett vorsamni ibadd zata punn tea padricho bhett sasnnak togta toslo. Khorench! Jezu jen’na amchea jivitant ani kherit bhaxen amchea kazari jivita bhitor sorta tedna amkam novo jiv, novi ghottai ani novem boll mellta. To amchea kazarant jen’na koxtt uprasta tachi milagr amkam disun ieta. Dekhunuch Jezu zavnk zai amchea jivitachem khorem bhanndar.

Cl. Renvick Pereira sdb