SADEA KALLACHO SOLLAVO AITAR

Aichea poilea vachpant ami aikolanv koxe bhaxen Jeremias provadi gonvlliank xidkaita ani sangta ki Dev tancher add vochunk asa karonn tannim tanchea hinddacho bore bhaxen samball korunk na ani tankam nakarla. He gonvlli, provadi mhonnta zaun asa Israelache mukheli. Tea kallachea Razank, Iadnikank ani lokank tanchea Deva poros aplea desachea karbarant bhag gheunk chodd mhotvachem dislem. Dev-mondirant ani Judeachea xarant visvas ghat chodduch vadlolo. Lok sonvsari gorzamni budlole. Jeremias provadi bhiem nastanam Devan vichun kaddlolea lokanchea ghatkeponna virudh uloita ani hem-ui sangta ki tanchea xaracho toxench Dev-mondiracho nas zatolo karonn tannim Devak nakarla ani hea fuddem tim pordexi desant porke lok koxe jietole.

He soglle akantache vell je ieunk asle modem Jeremias provadi urba, dhir ani sontosachim utramni uloita. To lokank sangta ki porzollit ani khuxal dis ietole. Thodde lok je pordexi desant koidi koxe ravtale te porot aplea desant xantin vagtole ani tanche mukheli tankam borea margar vhortole.

Bhagevont Paulu Efezkarank boroilole chittint Jezu Kristacho vaur hea sonvsarant kitem aslo te tin utranim sangta – “Tannem Xanti porgottli”. Jezun xantichi buniad hea sonvsarant ubi keli. Tannem mon’xea ani Dev zo amcho Bap ani rochnar hanchea modem somzonni haddli. Teach bhaxen tannem loka modem ekvott haddlo. Tannem tankam ekamekacho mog korunk xikoilo. Jen’na Farizev lokamni Jezuk vicharlem ki dha updesa modem khoincho updes mhotvacho, ten’na tannem tankam he bhaxen zobab dilo, “Sorvespora tujea Devacho sogllea tujea kallzan, sogllea tujea jivachea bollan, sogllea tujea monan, ani soglle tuje xoktin tum mog kortoloi ani tuzo mog kortai toso tujea peleachoi tum mog kortoloi.”

Ami bore bhaxen zannav ki amchi her Kristi bhav-bhoinni ho Jezun dil’lo updes moddla ani zaite pavtti amchea Xristi bhavarthachea xikovnne vorvim virudh geleanv. Hea vellar ami niraxi na zaunk ani he mhonnunk nozo ki Jezu Xristachi xikovnnecho kaim upeog na. Jezun xantichi buniad stapli, tannem aplea pattlavdarank xantin ravunk tenko dil’lo punn Jezu ken’nach mon’xachea ap-khuxent (free will) modem ailo na. Devachi xanti zaite pavtti ami hea sonvsarant haddunk fattim sorleanv. Jezu ama mon’xank je tacho updes pallnanv tankam ken’nach guniavkar dhorina punn to sodanch tankam bhogxita. Amchea ganvant, xarant, desant ani firgojent amchea utramni, kornniamni ani magnnea vorvim ami Jezucho mog ani xanti hea zogant ximpddaunk ami vaurum-ia.

Gel’lea aitarachea Xubvortomanant ami aikolanv ki Jezu bara zannank tanchea vixex kamak tankam ganvamni ani Galileachea nogrant borem utor porgottunk dhaddta. Vochun jivit bodlat mhunn lokank ulo marunk ani sobar vaittakarank ani zanncher devchar asloleank borim korunk Jezun tankam formailem. Aiz, Bhagevont Marku tanchem portonnem vixim sangta. Xis porot ieun apnnem jem kel’lem ani aikol’lem, titlem-i tannim Jezuk kollit kelem. Jezu tankam visov ghe mhunn sangta. Jezuchi apurbai ani somzikai aplea xisancher amkam disun ieta. Dhormdutamni chodd vaur kel’lo ani haka lagun Jezu zanna ki tankam visov zai karonn tannim Devacho vaur fuddem vhorunk zai. Punn zaite lok tanchea fattlean veta karonn tankam Devachi utram aikunk zai. Tankam ek Gonvlliachi goroz asli ani Jezu tankam urba, dhir ani sontosachea utramni Devachem raj porgott’ta. Zai zalear Jezun tankam porot ghora voch mhunn sangunk zatalem punn tancho bhavarth polloun Jezu khuxalborit zata.

He soglle lok je Jezuk ani tachea xisank mellunk ailole bhagevont nasle, te khalte asle ani nhoi chodd devosponnache. Tannim ekamekak fottoila, dusrea lokancho mog naslolo, tannim bhov thoddem magnem kel’lem ani zait ki te sonvsari vostunche gulam zaun asle. Punn Jezuk tancher doia disli.

Ami pollelanv ki aichim tinui vachpam amkam amchem kaliz bodlunk ani Deva kodde portun ieunk apoita. Ami sonvsari vostuk chittkun ravleanv ani haka lagun ami Deva thaun pois geleanv. Jezu bodlunk na: to tosoch aslo kal, aiz ani sodankal. Ji doiallai tannem tea lokank dakoili tich doiallai to amkam dakoita. Zaite pavtti Gonvlli naslolea hindda bhaxen ami hea jivitant sanddleanv. To amkam sodanch aplea kodde apoita. Tor ami magum-ia ki ami Devachem utor amchea jivitant pallunk ani he bhaxen ami Devachim mogall bhurgim koxi hea sonvsarant jieunk.

Cl.Jonathan Ribeiro, sdb