SADEA KALLACHO SOTRAVO AITAR

Pritichea bhavam-bhoinnimno, aichea vachpamni ami ‘Jezu, Jivitacho Unddo’ hachi khobor aikotanv. Mon’xachea jivitant tan ani bhuk heo bhov mhotvacheo gorzo zaun asat. Monis khaina jevina zalear osokt zata ani chodd osokt zalear morunk pasun xokta. Khoreponnim amchean sangunk zata ki, khann ani pivonn amcho jiv samballta, amkam boll ani ghottai dita, amchem poxonn korta. Khai nastana vo jevi nastana konnacheanui ravunk zaina.

Aichea poilea vachpant ami aikolam koxe bhaxen Devache xokten Elisha provadi unddeanchi milagr korta ani thoddexeach unddeamni xemboramni zomlolea lokank dhadoxi undde vanttun dita. Hantuntlean amkam Sorvespor Devachem udarponn ani aplea loka thaim tacho mog disun ieta. Tech bhaxen aichea dusrea vachpant, Efezkarank boroilolea chittint Bhagevont Paulu amkam, Kristacher bhavarth dhortoleank, aple Kristi apovnnek visvaxiponnan jeiunk formaita. Ani hem apovnnem ami sopurnnaien jieunche khatir to amkam khalteponnim, dulobaien ani sonsnikaien ekamekak adar diun, mog korat mhunn sangta. Karonn ami sogllim ekach Kristachi kudd, ekach Atmeachim bhagidaram, eka bhavarthan ani eka Povitr Snana vorvim Deva Bapa thaim jietanv. Dekhun oxem astana ami ekamekacho mog korun dusreanchea huskea-khontimni vantteli zaunk favo. He vorvim ami herank bori dekh ani Kristachi khori govaiki diunk pavtoleanv.

Devan mon’xacho itlo mog kelo ki, toi amche bhaxen monis zalo. Mon’xa soimban to amchem modem jielo, koxtt sonsle, khursar melo ano xekim mornnacher zoit vhorun to Punorjivont zalo. Ho zaun asa amchea bhavarthacho ghutt. Ami ghoddie chintunk puro ki itleanuch sogllem somplem. Jezu atam aplea Bapa sangata asa, hea sonvsarant nam. Punn khorem mhonnlear Jezun ho sonvsar soddche poilem  ‘Povitr Sonskar’achi stapna keli, ji ami misache povitr bolidanant bhettoitanv. ‘Hem mhojea ugddasak korat’ mhunnon Jezun apunn-khud’d Misa bolidanant unddea ani sorea rupant amchea kallzamni ieta. Hem vorvim Jezu amchem Doivik khann zalo. Aiche Xubhvortomanant ami aikolam koxe porim Jezu panch hozar lokank jevonn vaddta. Tea  vorvim aplea sorginchea jevnnachi ghutt legun tannem aplea xisank, ani amkam-i dili. Tea bhurgeachem udar mon polleun Jezu khuxal zata ani aplea Bapak dhin’vasun to aplea xisank te panch undde ani don masllio panch hozar loka modem vanttunk sangta. Xisank ani kherit bhaxen Filipak matui gomona koxem porim hem zaunk xokta. Tori astanam tannim aplea Guruchi adnea pall’li ani lokank zai title undde ani masllio vanttleo. Lokamni  pottbhor dhadoxi zai poriant te khale. He milagre vorvim Jezu ek dis apnnakuch moddun, vanttun ditolo mhunn khunnaita. He ghoddnnem vorvim amkam Devachem-i udarponn disun ieta.

Dev amkam amchea jivitant ami dhadoxi zai meren apli kurpa, kakllut ani doia ot’ta. Tachea udarponnak koslich mit-mer vo ott (kondisanv) na. Amchea dublleponnan ani khalteponnan ami jem kitem Devak ditanv, Dev to anikui chodd ani chodd mapan dusreanche boreponna khartir vaporta. Dekhun aichea hea misa bolidanant vantto ghetana  ami niall korun amkanch vicharum-ia – Devache Doivik Manddavollicher amkam bhorvanso asa? Amchea jivitant Devachem hem udarponn polleun heram khatir, tanche sevek ani adarak ami pavunk toir asanv? Zor na zalear Deva lagim tachea udarponnan hi kurpa ani boll magum-ia. 

- Cl. Jason Pinto, sdb

SADEA KALLACHO SOLLAVO AITAR

Aichea poilea vachpant ami aikolanv koxe bhaxen Jeremias provadi gonvlliank xidkaita ani sangta ki Dev tancher add vochunk asa karonn tannim tanchea hinddacho bore bhaxen samball korunk na ani tankam nakarla. He gonvlli, provadi mhonnta zaun asa Israelache mukheli. Tea kallachea Razank, Iadnikank ani lokank tanchea Deva poros aplea desachea karbarant bhag gheunk chodd mhotvachem dislem. Dev-mondirant ani Judeachea xarant visvas ghat chodduch vadlolo. Lok sonvsari gorzamni budlole. Jeremias provadi bhiem nastanam Devan vichun kaddlolea lokanchea ghatkeponna virudh uloita ani hem-ui sangta ki tanchea xaracho toxench Dev-mondiracho nas zatolo karonn tannim Devak nakarla ani hea fuddem tim pordexi desant porke lok koxe jietole.

He soglle akantache vell je ieunk asle modem Jeremias provadi urba, dhir ani sontosachim utramni uloita. To lokank sangta ki porzollit ani khuxal dis ietole. Thodde lok je pordexi desant koidi koxe ravtale te porot aplea desant xantin vagtole ani tanche mukheli tankam borea margar vhortole.

Bhagevont Paulu Efezkarank boroilole chittint Jezu Kristacho vaur hea sonvsarant kitem aslo te tin utranim sangta – “Tannem Xanti porgottli”. Jezun xantichi buniad hea sonvsarant ubi keli. Tannem mon’xea ani Dev zo amcho Bap ani rochnar hanchea modem somzonni haddli. Teach bhaxen tannem loka modem ekvott haddlo. Tannem tankam ekamekacho mog korunk xikoilo. Jen’na Farizev lokamni Jezuk vicharlem ki dha updesa modem khoincho updes mhotvacho, ten’na tannem tankam he bhaxen zobab dilo, “Sorvespora tujea Devacho sogllea tujea kallzan, sogllea tujea jivachea bollan, sogllea tujea monan, ani soglle tuje xoktin tum mog kortoloi ani tuzo mog kortai toso tujea peleachoi tum mog kortoloi.”

Ami bore bhaxen zannav ki amchi her Kristi bhav-bhoinni ho Jezun dil’lo updes moddla ani zaite pavtti amchea Xristi bhavarthachea xikovnne vorvim virudh geleanv. Hea vellar ami niraxi na zaunk ani he mhonnunk nozo ki Jezu Xristachi xikovnnecho kaim upeog na. Jezun xantichi buniad stapli, tannem aplea pattlavdarank xantin ravunk tenko dil’lo punn Jezu ken’nach mon’xachea ap-khuxent (free will) modem ailo na. Devachi xanti zaite pavtti ami hea sonvsarant haddunk fattim sorleanv. Jezu ama mon’xank je tacho updes pallnanv tankam ken’nach guniavkar dhorina punn to sodanch tankam bhogxita. Amchea ganvant, xarant, desant ani firgojent amchea utramni, kornniamni ani magnnea vorvim ami Jezucho mog ani xanti hea zogant ximpddaunk ami vaurum-ia.

Gel’lea aitarachea Xubvortomanant ami aikolanv ki Jezu bara zannank tanchea vixex kamak tankam ganvamni ani Galileachea nogrant borem utor porgottunk dhaddta. Vochun jivit bodlat mhunn lokank ulo marunk ani sobar vaittakarank ani zanncher devchar asloleank borim korunk Jezun tankam formailem. Aiz, Bhagevont Marku tanchem portonnem vixim sangta. Xis porot ieun apnnem jem kel’lem ani aikol’lem, titlem-i tannim Jezuk kollit kelem. Jezu tankam visov ghe mhunn sangta. Jezuchi apurbai ani somzikai aplea xisancher amkam disun ieta. Dhormdutamni chodd vaur kel’lo ani haka lagun Jezu zanna ki tankam visov zai karonn tannim Devacho vaur fuddem vhorunk zai. Punn zaite lok tanchea fattlean veta karonn tankam Devachi utram aikunk zai. Tankam ek Gonvlliachi goroz asli ani Jezu tankam urba, dhir ani sontosachea utramni Devachem raj porgott’ta. Zai zalear Jezun tankam porot ghora voch mhunn sangunk zatalem punn tancho bhavarth polloun Jezu khuxalborit zata.

He soglle lok je Jezuk ani tachea xisank mellunk ailole bhagevont nasle, te khalte asle ani nhoi chodd devosponnache. Tannim ekamekak fottoila, dusrea lokancho mog naslolo, tannim bhov thoddem magnem kel’lem ani zait ki te sonvsari vostunche gulam zaun asle. Punn Jezuk tancher doia disli.

Ami pollelanv ki aichim tinui vachpam amkam amchem kaliz bodlunk ani Deva kodde portun ieunk apoita. Ami sonvsari vostuk chittkun ravleanv ani haka lagun ami Deva thaun pois geleanv. Jezu bodlunk na: to tosoch aslo kal, aiz ani sodankal. Ji doiallai tannem tea lokank dakoili tich doiallai to amkam dakoita. Zaite pavtti Gonvlli naslolea hindda bhaxen ami hea jivitant sanddleanv. To amkam sodanch aplea kodde apoita. Tor ami magum-ia ki ami Devachem utor amchea jivitant pallunk ani he bhaxen ami Devachim mogall bhurgim koxi hea sonvsarant jieunk.

Cl.Jonathan Ribeiro, sdb

SADEA KALLACHO PONDRAVO AITAR

Pritichea bhava-bhoinnino, amcho Sorvpodvedar Dev aplea yevjonne vorvim zaitea lokank apoita ani tankam pattoita.  Amchea firgojent vavurtole padri ani madri, motthvaxi ani her bhavarthi hacho ek nomuno.

Jezu tankam bexttoch apoina, bogor tanchea jivitache dhyey/ xevott dakhovn dita. Oxem kortana to tankam kitem korunk zai ani naka tem sangta. Tache xikovnne pormannem ami  vavurlear amkam ek boro xevott mellta na zalear tea xevottacho purai ibadd zata.

Hench  aichea vachpamni amkam aikunk mellta. Poilea vachpant Sorvespor Dev Amos provadeak Amazia vorvim Judah prantant vochunk formaita. Punn eka sadea mon’xa bhaxen Amos chint’ta ki apunn ek sado monis, apunn provadeanchea kuttumbantlo nhoi, xivai apunn ek gonvlli ani rumbddea molleacho samballpi. Oxem astana Sorvespor mhojea Israel porjek tachem utor porgott korunk koxem mhunn sangta gai?

Dusrea vachpant, Bhagevont Paulu Efezkarank boroilolea chittint amkam koxe bhaxen Jezuk sorginchea Bapan amche khatir pattoilo, tannem kitem korunk zai ani naka te tankam sangta. Jezu aplem Devponn soddun sadea mon’xachem jivit jielo. Tannem aplea jivita vorvim amkam soddvonn dili. Apunn vetoch aplo Povitr Atmo pattoitolom mhunn amkam bhas dili.

Ani Xubhvortomanant ami aikotanv koxe porim Jezu aplea bara xisank doga-doganchea zoddieni dhaddta. Tankam to doivik apovnne dita. Apovnne ditana to tankam sangta ki provasak vetana tumi kitench vorum-nakat. Jea ghorant tumi bhitor sortat tankam mhoji xanti diat, punn zo konn tumkam yevkar dina, tachea ghorantli dhull legun tumi fafddiat. Sogllea xisamni Somiachea utrak pallo diun vhoddam ojapam kelim.

Jen’na ami amchea jivitacher nodor martanv ten’na amkam dista ami provas kortana amcho provas boro sukhacho zaunk zai. Thodde koxtt ailear ami dusreancher xirap martanv. Punn Jezu amkam oxem korunk sangina.

Jezu aplea xisank misanv ditana amkam 3 gozali dixtti poddtat. Poili mhonnlear tankam dil’le podve vorvim te devchar pois kortat. Dusrem to tankam prachit korunk sangta ani  tisrem dukhestant povitr telant makhchem ani tanchi pidda pois korink sangta. Te Jezu Kristache podven mhelle atme pois kortat. Judevanche somzovnne pormannem jea lokank pixem laglam te mhelle atmean bhorlole asle. Taka lagun pritichea bhava bhoinnino jen’na xis soitanchea fasantlean lokank soddoitat ten’na ami ojap zaunk favo nhoi, karonn ti podvi Jezu amkam-i dita, punn ami ti vollkunk pavonant.

Ek pavtti ek misionar eka ganvant vavurtalo. Teach gavant gaddeponn korpi lok aslo. Tea lokamni misionarak khub tras dinvcho proitn kelo. Punn tantunt tankam kainch ies mell’le nam. Jen’na tankam vicharlem oxem koxem korunk zalem gai? Ten’na gaddeponn kortolea lokamni mhonnlem, kiteak tacho Dev bollixt ani sorvpodvedar zaun asa.

Bhagevont Juanv aplea poile chittint chovthea ovesvorantle chovthe vollint hich xikvonn diun mhonnta: Tumi Devachim bhurgim ani hea disa sonvsarantlea Atmeancher zoit mell’la kiteak Bapachea Povitr Atmean tumi bhorleat. Kiteak Devacho Atmo sonvsarantle khoincheai Atmea poros vhoddlo.

Pritichea bhava bhoinnino Jezu jen’na tachi dennim amkam dita ten’na tache vorvim to amkam amchea bhavarthan ghott korta. Ho tache velo bhavarth oslea tachea kornneamni odik ani odik ghott zanv di mhunn hea bhettent ami magum-ia.

Bapache, Putache ani Povitr Atmeache nanvim. Amen. 

By Cl. Austin Fernandes, sdb

Greetings to you all from Don Bosco Youth Centre, Pune.

Greetings to you all from Don Bosco Youth Centre, Pune.

We the clerics of the Konkan Province have come together with the initiative to prepare sermons in Konkani. This venture is an occasion for us to prepare ourselves for the future ministry. We will be uploading the sermons of every Sunday 3 days prior to the date i.e Thursday. Hope it will benefit you in your apostolate and it will be a learning experience for us too.

Lot's of love,
Cls. Austin, Cresens, Jason, Joel, Jonathan, Kiran, Michael, Patrick and Renvick.