SADEA KALLACHO DUSRO AITAR: CYCLE C

Bhavam-bhoinnimno, Jezu Natalachea disa amche modem ailo ani toch Jezu amche modem ievn amchea dis-pottea jivitant misoll zalo. Aichea poilea vachpant ani xubhvortomanant, kazari jivitacher nodor ghalta. Kazaracho vell zaun asa ek sontosacho, khuxeicho ani utsovacho vhell. Kazara vellar lok mhurgottat. Novro aplea vhoklak polleun voir murgott’tta ani vhokoll aplea novreak pollevn murgott’tta. Poilea vachpant, Dev Siona vixim aplo mog dakhoita. Devachea bollan; Devachea mozotin Sion porzollit zata. Dev Siona lagin logn zata ani Devachea sontosan Sion sontos zata. Heach kazari jivitant, Dev sodanch vixvaxi ravta. Punn zaite pavtti ami Povitr sobheche bhurge je zavn asat Novi Sion, zaite pavtti ami ovixvaxi urtanv. Ami Devachea mogak zobab divnk zai. Devacho mog ami nhoi fokot onnbhovunk zai bogor to mog ami ximpddavnk zai. Dusrea vachpant, Bhagevont Paulu amkam amchea dennea vorvim, ami Devachea mogachi govaiki zavnk zai mhunn formaita. Dev amkam zaitim ani veg-vegllim otmik denneim dita. Ti soglim dennim nhoi amchea svotachea faideak, punn Povitr Sobhechea faideak ani boreponna khatir. Dekhunuch ami sogllim khaltikaien amchea gunnanchi vapor korunk zai. Jenn’a ami amche gunnanchi vapor amchea svotachea faideak kortanv, tenna ami Devak, zannem amkam rochlam ani he gunn dileat, tachi beporva ami kortanv. Zonnekleak aplea Devan dil’ea gunnacho vapor Povitr Sobhechea udorgoti khatir korunk zai.

Aichea xubhvortomanant, Jezu apli poili khunna(milagr) korat. Hea khunnea vorvim, Jezu adlea korarachi bhasavnnek purim korta. Toxench Jezu hea kazarant vantto ghevn, to tea kazarachea lokanchea akantant pavta. Hi milagr Jezuchea avoichea vinnovnen zata. Jezuchi avoi zavn asli, ani azunui zavn asa tachea karyachi bhagidar. Jezu hea kazarant vantto gheta, tacho bhett zaun asli tachem jivit. Oxim ek kanni asa, ek astik monis eka kheddea ganvant vochun, zaite bhett vanttpak lagta zoxe kopde, jevonn adi. Tea ganvant, padri kenna ietalo. Tea astik mon’xan ganvchea eka zanteak vincharta, ‘Tujea padrin tuka kaim haddunk na kiteak?’ Ten’na tea zanttean mhonnlem “Tunvem mhozo otmo pollunk ieta kai?” Tea astik monxan mhonnlem: ‘Na”. Tea zanttean zobab dilo “Zori tuka disun iet-aslem zalear, tuven ek dhovo angovstr polleun zatolem aslem, mhojea otmea vhoir tea padrin ek dhovo angostr ghaila, ani zoxe to ieta, to mhaka Povitr Sonvskara vorvim mhojea kallzan to Jezu ghalta”. Tuzo bhett vorsamni ibadd zata punn tea padricho bhett sasnnak togta toslo. Khorench! Jezu jen’na amchea jivitant ani kherit bhaxen amchea kazari jivita bhitor sorta tedna amkam novo jiv, novi ghottai ani novem boll mellta. To amchea kazarant jen’na koxtt uprasta tachi milagr amkam disun ieta. Dekhunuch Jezu zavnk zai amchea jivitachem khorem bhanndar.

Cl. Renvick Pereira sdb

KRIST JOYONTI - TEG RAIANCHI POROB Ek Sfurthi: Teg vegllea-vegllea dhormache monis ek dis sangatan melltat. Te aploch dhorm sarko mhonn bhasunk lagtat. Dhormak lagun tanche modem uzot zata. Tednam laginch ek zanttelo monis, zhadda mullant bosun aslo, tache-xim te aplo khottlo manddtat. Tankam bariksannen aikolea uprant ho zanttelo monis tankam oxi ek khobor sangta: "hea tea dongra sokoil ek pitt dollpachi gironn (flour Mill) asa. Thoim pavunk tin vatto asat. Ek mhollear, tea dongrar soroll choddun denvunk zata. Toxem kelear thoim rokddech pavtat punn khor choddti-denvti lagta. Dusrem mhollear, dongrache uzve vatten bhonvaddo marun thoim pavunk zata. Hi vatt titli lamb nhoi punn kantte, jhilkuttam, fonddkulam oxeo khub addkholli asat. Tisrem mhollear, dongrache dhave vatten bhonvaddo marun thoim pavunk zata. Hi vatt ekdom' lamb punn bhov sompi". Thoddo vell ogi ravlea uprant tea zanttelean tegankui mhollem, 'thoim pavtoch te girnnicho dhoni tum khoinche vatten aila tem vicharina'. Bogor to itlench vicharta, 'Ixtta, tuzo gonv (wheat) dakhoi, kitlo boro asa to polletam!' Devachem Utor: He porbek ami Teg Rayanchi porob oxem-i mhonntanv. Xubhvortomanant, ami teg vidvan je noketrachea adaran Ballok Jezuk bhettunk aile, ti khobor vachlea. Poilea ani dusrea vachpachea son'dorban, zor ami Xubhvortoman vachit zalear, Jezuch hem Noketr Zo sogllea lokank Razachea jevnna mezar bosounk vatt dakhovpi mhonn thavem zata. Udentiche teg vidvan mhollear onbhavarthi lokanche protinidhi zaunk zai. Jezu zaun asa Mesias. Rajki kullantle, apunnuch vichun kaddlole mhonn miroun herank kikont kortolea Herod-ank, hem noketr bhirantichi khobor porgott korta. Zannim Kristachi khobor kednanch aikunk na tanche sovem porian, Soddvonneche yevzonnent Devacho husko asa mhonn thavem zata. Devacho Mog sogllea mon'xank eksarkeaponnan vengoita mhonn Izaias Provadi sangta. Tednam tachi Mhoima sogllea porzancher porzoll ghaltoli ani hea vorvim xanti vostoli. Sant Paulu Efezkarank (je choddxe zann onbhavarthi asle) boroun, tankam Krista sovem bhavarth jiyeunk apoileat to ek khol ghutt oxem mhonnta. Map-mezop nastana Dev amcho mog korta mhonn thavem zata. Tea pasot soglleamni mogan jiyeunk goroz asa. Amchea Jivitak: Sogllim ami magir tim gorim, kallim, dadlo, bail, zati-katichim vo vegllea dhormanchim asum, amcho haves ekuch: 'hea sonvsarantle yatre vorvim ami Devak sodunk zai'. Teg vidvananim sogllea addkholincher zoit melloun ballka sovem Devacho rupkar polleun taka dhump, bhangar ani gondros him danam bhettoilim. Tech porim amchi-i vagnnuk zaunk zai. Jezu razancho Raza mhonn vollkhun te teg vidvan Taka nomoskar kortat. To ek nomunik Raza zache sovem Raiponn (bhangar), Devponn (dhump) ani Monisponn (gondros) asa. Noketr amkam uzvaddachi khunna. Amkam Dev melltoch, amich Uzvadd zaun soglleank khori vatt dakhoitat toslim zaunk amcho proyotn zaum di. Herod patxayachi chal zobordosti korpachi. Amkam Dev melltoch amchi chal vagnnuk eka-mekak sovem somjikayechi, sosnnikayechi, lhanvikayechi, dusreanchem boreponn sodtoli ani Devak toxem Peleak mandta tosli korunk ami vavrunk zai. Dev omkeach dhormanchea mon'xank nhoi bogor jim konn Taka promannik kallzan sodtat tankam mell'lea xivai ravchona. To amkam dor ekak mhonntolo, ''Ixtta, tuzo gonv (boreo kornneo) dakhoi, kitlo boro asa to polletam!'

-  FR AVE MARIA AFONSO